EU-OCS: Bandat shqiptare të drogës po rriten! Tashmë në mënyrë aktive ndikojnë në politikën shqiptare…
Sipas raporteve të shumta ndërkombëtare, organizatat kriminale shqiptare janë shumë aktive në trafikun e drogës. Përveç prodhimit lokal, tani ka rrugë të rëndësishme nga Amerika e Jugut, shkruan sot European Observatory of Crime and Security.
Organizatat kriminale shqiptare “kontrollojnë territoret, prodhojnë investime të konsiderueshme dhe ndikojnë në mënyrë aktive në politikën shqiptare”, thekson raporti i fundit i Shoqërisë së Hapur mbi evolucionin e krimit të organizuar në Shqipëri (2017).
“Shqipëria prodhon dhe eksporton një sasi të konsiderueshme të marijuanës, veçanërisht në Evropë, dhe është një vend tranzit për heroinën dhe kokainën afgane, duke shërbyer si porta kryesore për shpërndarjen e heroinës në Evropë”, shkruan Departamenti amerikan i Shtetit në raportin e tij mbi strategjinë për kontrollin ndërkombëtar të narkotikëve, publikuar në mars vituar 2018, duke vënë në dukje se edhe në qoftë se “numri i konfiskimeve dhe arrestimeve të drogës është rritur në vend gjatë viteve të fundit, mbeten dyshime rreth angazhimit të qëndrueshëm të qeverisë për vendosjen e ligjit. ”
Shqipëria është e regjistruar në hartën globale të drogës si një vend prodhues dhe nyje e shpërndarjes. Ky vlerësim u konfirmua edhe në Raportin Botëror të Drogës 2017 nga Kombet e Bashkuara, i cili thekson ekzistencën e “dëshmive konkrete” të përfshirjes së grupeve kriminale shqiptare në trafiqet më të mëdha të drogës në Evropë (heroinë, kokainë, kanabis).
Në shkurt të vitit 2018, për shembull, në portin e Durrësit u kap një ngarkesë rekord prej 613 kg kokainë të pastër, pasi mbërriti i fshehur në një kontejner me banane nga Kolumbia. Këtë ngarkesë policia shqiptare e vlerësoi 180 milionë euro, gjë që tregon se një rrugë e re është vendosur midis Amerikës Jugore dhe brigjeve shqiptare. Një fakt i konfirmuar edhe nga Agjencia Kombëtare Britanike për Krime, NCA, e cila vëren se “kriminelët në Ballkan po rrisin gjithnjë e më shumë rrjetin e tyre të influencës, duke krijuar marrëdhënie të drejtpërdrejta me furnizuesit e kokainës në Amerikën Latine”.
Për NCA, “kërcënimi i grupeve kriminale shqiptare është i rëndësishëm. Londra është qendra e tyre kryesore, por ata janë vendosur në të gjithë Mbretërinë e Bashkuar. ”
Ky zgjerim ndërkombëtar në mënyrë të pashmangshme prodhon pasoja brenda kufijve të Shqipërisë. “Shqipëria shërben si bazë për operacionet e organizatave rajonale kriminale. Paratë e paligjshme mund të riciklohen lehtësisht,” vëren Departamenti amerikan i Shtetit. Por si është rikthyer paraja e drogës në Shqipëri? Raporti i Shoqërisë së Hapur citon mbi të gjitha sektorin e pasurive të paluajtshme, kazinotë dhe qendrat e basteve, ashtu si dhe raporti i Departamentit të Shtetit, i cili thotë se “agjencitë ligjzbatuese e njohin nevojën për të luftuar pastrimin e parave, por mbeten shumë të paaftë për ta bërë këtë. ”
Por aktivitetet e botës së krimit shqiptar nuk kanë të bëjnë vetëm me forcat ndërkombëtare të policisë dhe vëzhguesit e brendshëm në vend. Këshilli Evropian, i cili u takua në fillim të verës për të vendosur nëse do të hapte ose jo negocaiatat e anëtarësimit me Shqipërinë, vendosi të shtyjë fillimin e bisedimeve për një vit. Këshilli, duke përshëndetur “përpjekjet” shqiptare, vëren se “shkatërrimi i grupeve kriminale mbetet një sfidë e rëndësishme”.
“Këshilli thekson rëndësinë që Shqipëria të jap rezultate të prekshme dhe të qëndrueshme, madje edhe në fusha specifike si lufta kundër kultivimit dhe trafikimit të drogës”, theksohet në deklaratën përfundimtare të takimit të Këshillit Evropian më 27-28 qershorit. Njëzet e tetë liderët evropianë ftojnë Tiranën të “vazhdojë dhe thellojë përpjekjet e tyre për të reduktuar kultivimin e kanabisit” dhe “të sigurojë arritjen e rezultateve konkrete në luftën kundër korrupsionit dhe shkatërrimit të rrjeteve të krimit të organizuar”.
Për këto dhe çështjet tjera, qeveria shqiptare do të duhet të punojë deri në vitin 2019 për ta bindur Bashkimin Evropian për hapjen e negociatave për anëtarësim. Deri në atë datë, “lufta pa mëshirë ndaj drogës” e premtuar në vitin 2013 nga kryeministri Edi Rama do të duhet të sjellë rezultate konkrete, përfundon shkrimin, European Observatory of Crime and security./EU-OCS/
