EURO 2024 i solli Kombëtares 10 mln €, tifozët shqiptarë shpenzuan 2.7 mln €

Kombëtarja Shqiptare e Futbollit mbylli Kampionatin e dytë Europian në historinë e saj, EURO 2024. Pavarësisht se nuk arriti të kualifikohej më tej pas fazës së grupeve.

Në një prej grupeve më të vështira të Kampionatit, Kombëtarja u shfaq dinjitoze me një barazim ndaj Kroacisë dhe dy humbje minimale ndaj Spanjës dhe Italisë.

Përveçse një rezultat i rëndësishëm nga pikëpamja sportive, pjesëmarrja në një garë futbollistike madhore, siç është Kampionati Europian, vlerësohet se u shoqërua me përfitime të rëndësishme të natyrës ekonomike.

Sipas informacionit nga Federata Europiane e Futbollit, UEFA, pagesa fikse e pjesëmarrjes për secilën nga federatat pjesëmarrëse në Euro 2024 ishte 9.25 milionë euro.

Këtyre u shtohet edhe shpërblimi për rezultatin, konkretisht barazimi i marrë ndaj Kroacisë, në shumën e 500 mijë eurove, për një të ardhur totale prej 9.75 milionë eurosh.

Por, pjesëmarrja në Europian solli të ardhura shtesë edhe nga burime të tjera, kryesisht nga sponsorizimet. Kualifikimi në Europian ishte natyrshëm një mundësi për disa kompani të rëndësishme në vend për të shfrytëzuar imazhin e ekipit kombëtar dhe një shtim të numrit të sponsorëve.

Megjithatë, Federata Shqiptare e Futbollit ndjek një politikë të mospublikimit të treguesve financiarë, duke përfshirë natyrisht edhe të ardhurat nga sponsorizimet. Për këtë arsye, është e vështirë të bëhet një bilanc i plotë i të ardhurave të FSHF-së nga ky aktivitet.

Në një intervistë për “Monitor” përpara Kampionatit Europian, Presidenti i FSHF-së, Armand Duka, tha se objektivi ishte që të ardhurat e FSHF të dyfishoheshin pas pjesëmarrjes në Europian.

Megjithatë, ai theksoi se në një kompeticion të madh, siç është Euro 2024, edhe shpenzimet janë të konsiderueshme.

Sipas tij, një pjesë e mirë e shpërblimeve të përfituara nga kualifikimi për në finalet e Kampionatit Europian u përdorën pikërisht për të mbuluar shpenzimet e pjesëmarrjes në këtë turne madhor.

Ndeshjet e Kombëtares gjatë këtij Kampionati Europian ngjallën interes shumë të madh mes shqiptarëve të Shqipërisë dhe të diasporës.

Madje, të paktën për dy ndeshjet ndaj Italisë dhe Spanjës, vlerësohet se tifozët shqiptarë ishin në shumicë të dukshme në stadiumet e Gjermanisë.

Të pyetur nga “Monitor”, burime nga Federata Shqiptare e Futbollit u shprehën se nuk ka ende një vlerësim të saktë të numrit të tifozëve shqiptarë që ndoqën ndeshjet e Kombëtares. Sipas burimeve, ky informacion është kërkuar në UEFA, që ka menaxhuar direkt shitjen e biletave për tifozët.

Sipas informacionit paraprak nga UEFA, numri i biletave në dispozicion për tifozët e secilës kombëtare ishte 10 mijë për çdo ndeshje.

Kjo nënkupton se të paktën për fazën e grupeve, biletat në dispozicion të tifozëve të Kombëtares Shqiptare ishin rreth 30 mijë. Megjithatë, numri i tifozëve me siguri ka qenë shumë më i madh, sepse biletat mund të siguroheshin më tej edhe në fazën e rishitjes së tyre.

Për të luftuar tregun e zi të biletave, UEFA madje pati ndërtuar një platformë online të rishitjes së tyre.

Duke iu referuar raportimeve të mediave të atashuara pranë Kampionatit Europian, një vlerësim i përafërt i numrit të tifozëve shqiptarë që ndoqën ndeshjet e Shqipërisë ishte rreth 90 mijë, nga të cilët 50 mijë me Italinë, 35 mijë me Spanjën dhe 15 mijë me Kroacinë.

Për ndeshjet e fazës në grup, çmimet e biletave për shitjet nga UEFA fillonin nga 30 euro deri në 200 euro, në varësi të vendndodhjes në stadium. Por, në fazën e rishitjes, çmimet vlerësohet se kanë qenë shumë më të larta.

Ndërkohë, disa prej agjencive të udhëtimit në Shqipëri kanë ofruar paketa për ndjekjen e ndeshjeve të Kombëtares, që përfshinin fluturimin charter, transfertat në stadium dhe biletat e ndeshjeve. Paketat e mësipërme për secilën ndeshje kishin çmime në intervalin mes 1000 dhe 1300 eurove.

Mund të thuhet me siguri se shqiptarët kanë shpenzuar shuma të mëdha për të ndjekur Kombëtaren në Europian, megjithëse një vlerësim qoftë edhe i përafërt i shpenzimeve totale, është i vështirë.

Duke shumëzuar numrin minimal të biletave të alokuara për Shqipërinë me çmimin minimal të biletës, e sigurt është që vetëm për biletat janë shpenzuar të paktën 900 mijë euro.

Por, shuma reale vlerësohet të jetë disa herë më e lartë, sepse numri i tifozëve ishte më i lartë se 30 mijë dhe çmimi i biletave në shumicën dërrmuese të rasteve ishte më i lartë se 30 euro.

Nëse marrim për të mirëqenë vlerësimin se Kombëtaren e ndoqën rreth 90 mijë tifozë shqiptarë, atëherë shpenzimi minimal për biletat ishte të paktën 2.7 milionë euro.

Por, edhe në këtë rast, vlera reale ka qenë me siguri shumë më e lartë, po të kemi parasysh se shumica e tifozëve i kanë blerë biletat në fazën e rishitjes, kur çmimet kanë qenë disa herë më të larta se ato fillestare.

Duke shtuar shpenzimet e udhëtimit, akomodimit dhe qëndrimit, mund të thuhet me siguri se fatura totale që paguan shqiptarët për kënaqësinë e ndjekjes së Kombëtares në Gjermani ishte në rendin e miliona eurove. /Monitor/