Europoli në Ballkan: 8.300 policë, arrestojnë 148 persona. Ka dhe shqiptarë…

Europoli, pas një operacioni me 8.300 zyrtarë të cilët kanë kontrolluar rreth 500.000 njerëz, ka arrestuar 148 persona në Ballkan.

Operacioni i cili zgjati disa ditë rezultoi me arrestimin e 13 kontrabandistëve emigrantësh, 71 emigrant të paligjshëm, 36 trafikantë droge, 3 trafikantë të armëve të zjarrit, 5 trafikantë të drogës dhe të armëve, 16 falsifikatorë dokumentash, nga Shqipëria, Mali i Zi, Bosnje Hercegovina etj.

Në përfundim të operacionit bëhet e ditur se janë sekuestruar: 159 armë zjarri, eksplozivë dhe armë të tjera, si dhe 286 kg drogë. Ky operacion zbuloi edhe mashtrimin me viza për 22 persona, u zbuluan 42 dokumenta të falsifikuar, dhe 612 hyrje klandestine.

Koordinimi nga Haga

44 oficerë nga shumica e vendeve pjesëmarrëse, Frontex, Interpol ishin pjesë e një Qendre koordinimi e cila u krijua në selinë qendrore të Europolit në Hagë nga 5-9 shtator 2018.

56 përfaqësues nga Frontex shoqëruan oficerët në terren në disa takime operacionale dhe aktivitete për grumbullimin e informacionit, fazë kur janë shkëmbyer disa qindra informacione, janë kontrroluar 60 shtëpi, janë arrestuar 32 të dyshuar dhe janë konfiskuar 102 armë.

Në operacion morën të gjitha vendet e Ballkanit Perëndimor: Shqipëria, Kosova, Bosnja dhe Hercegovina, Maqedonia, Mali i Zi dhe Serbia. Përveç tyre, janë përfshirë edhe 20 shtete anëtare të BE-së: Austria, Belgjika, Bullgaria, Kroacia, Çekia, Danimarka, Franca, Gjermania, Greqia, Hungaria, Letonia, Hollanda, Polonia, Portugalia, Rumania, Sllovakia, Sllovenia, Spanja, Suedia dhe Mbretëria e Bashkuar. Gjatë këtyre ditëve, aksioni u mbështetë nga Zvicra, Shtetet e Bashkuara, INTERPOL dhe Frontex në mënyrë që të lehtësonin rrjedhën e informacionit dhe të kontrollonin të dhënat nga bazat e të dhënave ekzistuese.

Gjithsejë janë kontrolluar 482.014 njerëz, automjete, ambiente dhe parcela dhe janë arrestuar 180 persona , 32 në fazën paraprake të inteligjencës dhe 148 gjatë fazës operacionale.

Duke filluar nga 10 shtatori, janë inicuar 21 hetime të reja dhe pritet që numri i përgjithshëm i arrestimeve të rritet në ditët në vijim.