“Eurotay”, Vuçiç: Faleminderit o vëlla turk që punësove edhe gra 50 vjeçe

Presidenti i Serbisë, Aleksandar Vuçiç gjatë vizitës në ndërtimin e Fabrikës së Tekstilit “Eurotay” në Kralevë, u mrekullua kur pa 100 punëtoret e para që kishin filluar trajnimin dhe nuk ishin vetëm vajza të reja:

“Më vjen mirë që nuk punojnë vetëm vajza 25 vjeçe. Faleminderit, o vëlla turk, që ke pranuar edhe gra 50 vjeçe. Ato janë gra të vyera dhe të afta që do të tregojnë besnikëri,”  tha Vuçiç duke theksuar se në përurimin e fabrikës në prill të vitit 2019, do të vij edhe presidenti turk Rexhep Tajip Erdogan, raportojnë mediat serbe.

Me këtë rast, Presidenti i Serbisë tha se fjala është për një investim të madh prej 35 milionë eurove, këtu ku janë gërmadhat e fabrikave të mëdha:

“Gjatë dekadave të kaluara, shumë fabrika në këtë qytet janë shkatërruar, Magnohrom, Jasen, Autotransport dhe askush nuk dëshironte që të vijë në Kralevë sepse qeveria e kaluar i shkatërroi,” tha Presidenti i Serbisë, Aleksandar Vuçiç duke akuzuar opozitën edhe me këtë rast.

Ndryshe, Fabrika e tekstilit “Eurotay”, e cila po ndërtohet në Adrani afër  Kralevës, do të punësoj gjithsejtë 2.500 njerëz. Hapja solemne do të bëhet në prillin e vitit 2019 ndërkohë ka filluar trajnimi i 115 punëtorëve.