Evakuohen mbi 10 familje në lagjen “2 Korriku” në Mitrovicë

Gjendje më e rëndë si pasojë e përmbytjeve nga reshjet e shiut ishte sot në qytetin e Mitrovicës. Në lagjen “2 Korriku” janë evakuuar 10 familje të cilat rrezikoheshin nga përmbytjet. Kryetari i Mitrovicës së Jugut, Faton Peci, tha se komuna ka kapacitete të mjaftueshme për t`i ndihmuar familjet e prekura.

Shiu e bora e pasdites së djeshme bëri që lumi Sitnica të dalë nga shtrati e të rrezikojë jetën e dhjetëra banorëve në lagjen “2 Korriku” në Mitrovicë. Mbi 15 zjarrfikës nuk u ndalën në 24 orët e fundit, teksa evakuuan mbi 10 familje në këtë lagje e cila deri në orët e mëngjesit u përmbyt nga vërshimet.

Zëvendëskomandanti i Brigadës së Zjarrfikësve në Mitrovicë, që në mëngjes po udhëhiqte të gjithë aksionin e shpëtimit të qytetarëve që kishin mbetur brenda shtëpive në këtë lagje, po pranonte në të njëjtën kohë edhe kërkesat për evakuim nga lagje të tjera, që po ashtu ishin përmbytur.

Kryetari i Mitrovicës së Jugut, Faton Peci, tha se komuna ka kapacitete të mjaftueshme për t`i ndihmuar familjet e prekura.

“Neve na mbanë shpresa, ka tendencë përmirësimi të Sitnicës. Ne kemi paraparë që rreziku të jetë edhe më i madh, pres rehabilitimin e shtratit Sitnica” tha Faton Peci, kryetar i komunës së Mitrovicës së Jugut.

Më vonë ndihmë kërkuan edhe disa banorë në fshatrat Lisicë dhe Kçiq. E pavarësisht rrezikut potencial, një prej sfidave që zjarrfikësit hasën në terren gjatë ditës, ishte që t`i bindnin banorët që t’i lëshonin shtëpitë e tyre të përmbytura nga Sitnica.

Gjakovë, situata nën kontroll

Në Gjakovë, gjendja është stabël dhe e menaxhueshme pas dëmeve të shkaktuara nga reshjet e ditës së djeshme. Sipas autoriteteve komunale, situata është vënë nën kontroll falë ndërhyrjeve të shpejta të ekipeve emergjente.

Drejtori për Emergjenca në Komunën e Gjakovës ka bërë të ditur se institucionet komunale kanë arritur ta menaxhojnë situatën dhe se aktualisht nuk ka rrezik për qytetarët. Ai theksoi se ekipet kanë qenë në terren që nga orët e para dhe kanë reaguar sipas planit emergjent.

“Duke i pa reshjet edhe situatën e cila ka qenë, ne ja kemi dalë shumë mirë me menaxhuar situatën, edhe po menaxhojmë, po me të vërtet ka dëme shumë të mëdha materiale,” tha Pranush Komoni, u.d. i drejtorit të emergjencave.

Ndërkohë, drejtoresha për Shëndetësi dhe Mirëqenie Sociale tha se familjet e prekura janë strehuar në banesa sociale dhe se po u ofrohet mbështetja e nevojshme deri në normalizimin e plotë të gjendjes.

“Ne menjëherë kemi trajtuar rastet të cilat veç kanë qenë në gjendje shumë të rëndë. Të gjitha ato shtëpi që i keni pa nëpër media, jemi përkujdesur që familjet e rasteve emergjente t’i strehonim në banim social,” tha Dafina Kazazi Olloni, u.d. e drejtorisë për Shëndetësi dhe Mirëqenie Sociale.

Edhe njësitë e zjarrfikësve kanë konfirmuar se janë në gatishmëri të plotë për intervenim. Sipas tyre, aktualisht po ndërhyhet në shtëpitë e qytetarëve që kanë kërkuar ndihmë për pastrimin e objekteve të përmbytura.

”Për momentin nuk e kemi asnjë zonë të rrezikuar, veç jemi duke intervenuar aty-këtu tek ndonjë shtëpi në ndonjë podrum,” tha Xhevdet Brahimaj, komandant i batalionit të zjarrfikësve në Gjakovë.

Kurse në Junik sot ka filluar pastrimi i rrugës, pas rrëshqitjes së dheut në fshatin Jasiq.

Ndërkohë, sot Komisioni Qendror për Vlerësimin e Dëmeve ka vizituar zonat e përmbytura nga uji në Rahovec, Gjakovë dhe Junik, me qëllim të monitorimit të punës së komisioneve lokale dhe ofrimit të këshillave profesionale për vlerësimin e dëmeve. Vizita është udhëhequr nga kryesuesi i Komisionit Qendror për Vlerësimin e Dëmeve, Kastriot Lajqi, së bashku me anëtarët e komisionit.