Evropa kundër Presidentit Trump!
nga Agim Popoci
Katër ditë para takimit Kosovë-Serbi në Shtëpinë e Bardhë, kur Presidenti i Serbisë, Aleksandar Vuçiç tha në Moskë se Presidenti i Rusisë, Vladimir Putin i kishte thënë një fakt të tmerrshëm, askush nuk u mor me këtë deklaratë.
Shqiptarët, jo se jo! Ashtu siç nuk ishin marrë me gjëra shumë më të tmerrshme, duke shpërfillur gjithë trajektoren e kurimit të imazhit të Serbisë pas luftës së përgjakshme në Ballkan, pa u shqetësuar se po shkonin drejtë një humnere pa kthim. Madje, shqiptarët nuk u shqetësuan edhe kur u ulën këmbëkryq në këtë humnerë të ndërtuar nga një kriminel zviceran që u quajt, Gjykata Speciale.
Shumë ujëra rrjedhën nën Danub nga ajo kohë, Beogradi vazhdoi betejën e tij për Kosovën jo pa sukses, e Prishtina dhe Tirana në gjumë, sot agresivitetin serb të ndihmuar me atë rus nuk kanë se si ta kuptojnë, kur takimin e Washingtonit më 27 Qershor në Shtëpinë e Bardhë e minon Brukseli, përkatësisht Rusia, me një tundje të vetme të prangave nga Haga.
Uniteti kombëtar që shpërtheu për Hashim Thaçin dhe Kadri Veselin nuk është solidarizim, është primitivizëm; Ose, më saktë, është një solidarizim i atyre që lejuan denigrimin e Kosovës nga Serbia, dhe i japin të drejtë vetes të konsiderohen protagonist të përballjes së madhe SHBA-Rusi, e tashmë edhe SHBA-Evropë!
Në shtatorin e vitit 2009, kur Serbia kishte shpikur Shtëpinë e Verdhë për t futur në agjendën e Këshillit të Evropës, dhe hapi betejën në Gjykatën Ndërkombëtare të Drejtësisë për të kontestuar Shpalljen e Pavarësisë, Ish-I dërguarit amerikan për Kosovën, Richard Holbrook, tha qartë para deputetëve të Kosovës:
“Rusët nuk mërziten se çfarë po ndodh këtu. Ata po veprojnë kështu për shkak se duan që t’i kundërpërgjigjen Shteteve të Bashkuara të Amerikës!”
Ndonëse këtë nuk po e thoshte thjeshtë një amerikan por njëri ndër njohësit më të mirë të rrethanave të Ballkanit, Serbisë dhe vetë kriminelit Slobodan Millosheviç, kjo nuk shqetësoi njeri në Prishtinë. Dhe me këtë shpërfillje bashkëjetuan shqiptarët deri sot kur Evropa tashmë ka hapur luftën kundër Presidentit të SHBA, Donald Trump, dhe shkeli me këmbë edhe Kosovën për të denigruar presidentin amerikan që nuk e pëlqen tashmë as Berlini dhe as Parisi!
Të gjithë ata që nuk respektuan fjalët e Holbrook dhe lejuan në rënie të lirë zhvillimin e ngjarjeve, menduan se është e thjeshtë edhe të shkëmbehen territoret, Veriu të shkojë andej e Lugina e Preshevës këtej, të ikë Isa Mustafa dhe të vjen Ramush Haradinaj, të ikë Albin Kurti dhe të vjen Avdullah Thaçi, të prehen hartat dhe të mbyllen sytë sepse aty është një Grenell, një Thaç me Vuçiç dhe një Baton me piktor Edin. Por, janë mashtruar rëndë!
Që në ditën e parë të çlirimit të Kosovës, kur Mitrovica filloi të ndahet nga francezët dhe të gjithë ata që nuk ishin nga ky qytet i mbyllën sytë, u pa qartë se nuk kishim të bëjmë thjeshtë me një arritje të paqes, me një Kosovë që do të shikoj nga e ardhmja së bashku me Serbinë që në krye të saj nuk është Milosheviçi.
Serbët e humbën luftën por jo paqen ndërsa shqiptarët e dehur me fitoren i shpërfillën të dyja! Përdhosën luftën çlirimtare me dorën e vetë dhe kontribuan në masë të madhe në kurimin e imazhit të Serbisë kriminale që ngopi me gjak, gjithë Ballkanin.
Shfaqja e Shtëpisë së Verdhë dhe shpërfillja që iu bë vuajtjeve të Familjes Katuçi në Gurrë të Burrelit që nga viti 2003, nga agjentë serbë dhe jo vetëm, sot i bie kokës pikërisht atyre që shpërfillën këtë fushatë të kurimit të imazhit serbë që u kryesua nga një kriminel zviceran dhe shërbëtor i Serbisë, Dick Marty, kontributi i të cilit kulmoi me themelimin e Gjykatës Speciale për Krime Lufte.
Nuk dihet nëse do të planifikonte Richard Grenell takimin në Shtëpinë e Bardhë më 27 Qershor nëse Hashim Thaçi do të reagonte që në ditën e parë kur u shpik Shtëpia e Verdhë, kur Beogradi filloi fushatën agresive dhe kur u sajuan trazirat e vitit 2004. Dhe, nuk dihet nëse do të duhej ky angazhim i Grenellit sikur kryeministri i Kosovës, Hashim Thaçi, në vitin 2010, në Prishtinë do ta kishte në krah Abdullah Katuçin dhe ekspertët e transplantimit të organeve për të hedhur poshtë akuzat e Beogradit për Shtëpinë e Verdhë, dhe jo kriminelin Aleksandar Vuçiçin në Bruksel, për ti bërë qejfin Evropës.
Por, është e sigurt se sot nuk do të kishim një Gjykatë raciste siç e projektoi prokuroria serbe dhe e futi në agjendën evropiane Dick Marty; Dhe, është e sigurt se kjo gjykatë nuk mund të përdorej nga Macron dhe Merkel duke kërcënuar me burg Presidentin e Kosovës për kusuret e Presidentit të SHBA, Donald Trump.
Përdorimi i faktit, se një prokuror amerikan ka ngritur aktakuzë ndaj Presidentit të Kosovës, Hashim Thaçi dhe Kryetarit të PDK, Kadri Veseli, e bënë edhe më kriminale atë që ndodhi me Gjykatën Speciale për Krime Lufte 3 ditë para takimit të organizuar në Shtëpinë e Bardhë nga Përfaqësuesi i Presidentit të SHBA, Donald Trump, për dialogun Kosovë-Serbi, Richard Grenell.
Shqiptarët sot duhet të ulen me këmbë në tokë dhe ti bëjnë një skanim asaj që ndodhi në tokën kosovare që nga krijimi i saj. Në vitin 1912 Kosova nuk u nda rastësisht; Kështu ndodhi edhe pas luftës së dytë botërore me bërjen nul të Konferencës së Bujanit; Ashtu siç ndodhi me Mitrovicën dhe pjesën e veriut të Kosovës në vitin 1999; U përsëritën trazirat në vitin 2004, erdhi momenti i Shpalljes së Pavarësisë, mendimi i Gjykatës Ndëkombëtare të Drejtësisë, shpikja e Shtëpisë së Verdhë, themelimi i Gjykatës Speciale për Krime Lufte dhe së fundi takimi në Shtëpinë e Bardhë.
Sot, pas këtij skanimi shqiptarët do ta kutpojnë se pse duhet të mendojnë vetëm për Kosovën dhe nuk kanë arsye të ngatërrohen në përballjen e elefantëve ose të shprehin ndonjë urrejtje ndaj Evropës pse ajo i ka shpallur luftë Presidentit të SHBA, Donald Trump. Këtë e zgjidhë Amerika vetë; Ndërsa detyrë e Kosovës padyshim ngelet që të mos harrojë pse ekziston dhe se ka vetëm një krijues, Amerikën!
Por, gjithashtu, shqiptarët duhet ta kenë të qartë se me ose pa këtë urrejtje, Evropa ishte dhe është në anën serbe. Dhe, këtë me kohë e ka shprehur shumë qartë At Gjergj Fishta:
Uh! Evropë, ti kurva e motit!
Që i re mohit, besës së Zotit!
Po, á ky asht sheji i qytetnisë?
Me da token e Shqypnisë,
Për me mbajt klyshtë e Rusisë?
