Facebook heq një intervistë me Ish-Presidentin Trump

Facebook hoqi një video të Ish-Presidentit të SHBA, Donald Trump, nga faqja e nuses së tij, Lara Trump.

Gjiganti i mediave sociale e bllokoi Trumpin në janar, pasi mbështetësit e tij sulmuan dhunshëm ndërtesën e Kongresit në Washington.

Lara Trump, bashkëpunëtore e re e Fox News, postoi një video të saj duke intervistuar ish-presidentin për një sërë çështjesh. Ajo më vonë postoi një email që mori nga Facebook, duke e paralajmëruar atë për heqjen e intervistës.

Facebook tha se intervista u hoq në përputhje me vendimin për bllokimin e Trumpit nga ky rrjet social.

Pas trazirave në Kongres, Donald Trump u bllokua edhe nga Twitter dhe YouTube.

Lara Trump, e cila është e martuar me djalin e Ish-Presidentit, Eric, raporton RFE, e postoi më pas intervistën në video-platformën Rumble.