Fajon: Integrimi i Ballkanit Perëndimor përgjigje e BE-së ndaj ndikimit rus

Ministrja e Punëve të Jashtme e Sllovenisë, Tanja Fajon, tha se integrimi i vendeve të Ballkanit Perëndimor është në krye të listës së prioriteteve të Bashkimit Evropian, BE, dhe se është përgjigje kyçe ndaj rritjes së ndikimi rus në këtë rajon.

Tanja Fajon, sot në Sarajevë, Fajon diskutoi me Ministren e Punëve të Jashtme të Bosnje Hercegovinës, BeH, Bisera Turkoviç, për marrëdhëniet midis dy vendeve, ndikimin rus në Bosnje Hercegovinë dhe reformat e nevojshme me të cilat përballen institucionet e këtij vendi në rrugën evropiane.

Ajo i uroi qytetarët e Bosnje Hercegovinës për statusin e kandidatit për anëtarësim në BE dhe premtoi ndihmë profesionale në zbatimin e reformave të nevojshme, me të cilat do të përballet Bosnje e Hercegovina në rrugën e saj drejt BE-së.

“Sllovenia ia zgjati dorën Bosnje e Hercegovinës dhe në radhë të parë varet nga ju se sa fort do ta shtrëngoni atë dorë të shtrirë nga Sllovenia dhe BE-ja,” tha Fajon duke shtuar se se institucionet e Bosnje Hercegovinës do të duhet të bëjnë pjesën e tyre të detyrës dhe të përmbushin 14 prioritetet e caktuara nga Komisioni Evropian dhe se pikërisht kjo do të përcaktojë shpejtësinë e anëtarësimit në Bashkimin Evropian.

Marrëdhëniet ndërmjet Bosnje Hercegovinës dhe Sllovenisë, konstatoi Fajon janë të mira dhe nuk ka çështje të mëdha të hapura ndërmjet dy vendeve. Siç tha ajo, në Bosnje Hercegovinë operojnë rreth 100 kompani sllovene, të cilat punësojnë rreth 15 mijë qytetarë të Bosnje Hercegovinës.

“Këmbimi i mallrave po shënon rritje dhe aktualisht është rreth gjysmë miliardë euro,” tha Fajon, duke shtuar se gjatë vizitës do të takohet me biznesmenë dhe komunitetin akademik për të diskutuar mbi mundësitë e përmirësimit të bashkëpunimit mes dy vendeve.

“Unë jam njoftuar me rritjen e ndikimit rus në Bosnje Hercegovinë,” tha Fajon, duke shtuar se uniteti në Evropë është vendimtar për t’iu përgjigjur pushtimit rus në Ukrainë.

“Negociatat me Maqedoninë e Veriut, regjimi pa viza për Kosovën dhe zgjerimi në Ballkanin Perëndimor janë lartë në listën e prioriteteve”, tha Fajon, duke shtuar se Sllovenia për këtë do të ofrojë ndihmën teknike e politike dhe se është thelbësore që Bosnje Hercegovina, pas formimit të qeverisë së re, të vazhdojë në rrugën e saj drejt BE-së.

Ministrja e Punëve të Jashtme e Bosnje e Hercegovinës, Bisera Turkoviç tha se vendi i saj po përballet me përpjekjet e vazhdueshme të forcimit të ndikimit dhe destabilizimin rus.

“Janë njoftimet e mediave ruse që paralajmërojnë turbulenca të mëtejshme në Kosovë por edhe në BeH. Kemi pasur disa përpjekje nga ekspertë mjeko-ushtarakë rusë në kohën e COVID-it. Kemi pasur një autokolonë që priste thirrjen nga Mostari. Kemi pasur dy aeroplanë që kanë arritur dhe doli që nuk ishin ekspertë mjekësorë por ushtarakë,” tha Turkoviç duke shtuar se njoftimet e përditshme dhe destruktive për shkëputjen nga Bosnje Hercegovina të entitetit Republika Srpska dhe për bashkimin e saj me Serbinë, përmes promovimit të “Botës Serbe”, nuk janë aspak të padëmshme dhe vijnë me mbështetjen e fuqishme të Rusisë.

Në fund , për dekoratën e dhën Vladimir Putinit në Republikën Srpska, Ministrja e Punëve të Jashtme të Bosnje Hercegovinës, Bisera Turkoviç, tha se është një shuplakë ndaj gjithë botës demokratike.