“Falsifikim i dokumenteve shtetërore, Ilir Meta kallëzon penalisht Autoritetin e Dosjeve

Kryetari i Partisë së Lirisë, Ilir Meta, ashtu siç kishte paralajmëruar sot ka kallëzuar penalisht pranë SPAK, Autoritetin për Informim mbi Dokumentet e Ish-Sigurimit të Shtetit përkatësisht anëtarët e saj, Gentiana Sula, Albert Nikolla, Altin Hoxha, Gjergj Marku dhe Skënder Vrioni, për falsifikim të dokumenteve shtetërore, falsifikim të vulave, shpërdorim detyre, përhapje të informatave të rreme dhe zbulim të dhënave sekrete.

“Sot kam kallëzuar penalisht anëtarët e Autoritetit të Dosjeve për shkeljet e rënda dhe të qëllimshme që i kanë bërë ligjit organik për dosjet e ish-Sigurimit të Shtetit, për manipulimet dhe falsifikimet flagrante në shërbim të shantazhit politik, për llogari të Edi Ramës,” thekson Ilir Meta përmes rrjetit social Facebook duke bërë publik dhe kallëzimin penal pranë SPAK dhe Prokurorisë së Rrethit Gjyqësor Tiranë.