Falsifikoi formularin e dekriminalizimit, Prokuroria kërkon burg për gjyqtarin Thanza

Prokuroria e Tiranës kërkoi 1 vit e 6 muaj burg për Ish-gjyqtarin e Gjykatës së Lartë, Admir Thanza, i cili akuzohet për falsifikim të formularit të dekriminalizimit.

Hetimi për gjyqtarin nisi pas seancës dëgjimore të Komisionit të Pavarur të Kualifikimit ku konstatoi se Admir Thanza është dënuar me vendim të formës së prerë për grabitje në Itali.

Vetë gjyqtari ka pretenduar se procesi ndaj tij nuk është ligjor dhe ai nuk ka pasur detyrim të deklaronte një fakt të tillë por DSIK e nxori të papërshtatshëm për vazhdimin e detyrës .

Ndryshe, Gjyqtari Admir Thanza nuk kishte deklaruar në formular një dënim me burg të marrë nga gjykatat italiane në vitin 1999.  Thanza ka fshehur një dënim të formës së prerë në Itali me 2 muaj burg dhe 150 mijë lireta gjobë, pasi akuzohet se ka vjedhur rroba dhe gjëra kozmetike në një market në Itali. Po ky dënim më vonë është pezulluar.

Gjyqtari, kur u përball me Komisionin e Pavarur të Kualifikimit, nuk e ka pranuar konsumimin e veprës penale dhe për rastin në fjalë tha se kishte marrë përsipër veprimin e ish-kunatës së tij për të shpëtuar jetën e nipit, që kurohej në Itali nga sëmundje e rëndë.

Ai u zotua se nuk e ka kryer veprën penale, për të cilën ka marrë dënimin por mosdeklarimi i saj në formularët e dekriminalizimit përbën vepër penale sipas ligjit në fuqi.