Farsa elektorale e 14 majit, Berisha: Bandat dhe policia u shkrinë në një!

Bandat dhe policia u shkrinë në një gjatë farsës elektorale të 14 majit 2023, tha sot Kryetari i Partisë Demokratike, Sali Berisha, duke shtuar se rezultati i partisë së Tom Doshit është dëshmia më e zezë dhe më e turpshme e blerjes së votës, ndërsa u zotuar se Statuti i PD do zbatohet dhe analiza e këtyre zgjedhjeve do jetë e plotë.

Lidhur me zhvillimin e fundit në grupin e deputetëve mbështetës të Lulzim Bashës, ku pas dorëheqjes së Enkelejd Alibeajt zgjodhën Gazment Bardhin si Kryetar të ri të Grupit Parlamentar, në këtë konferencë të përjavshme, Kryetari i Partisë Demokratike tha se nuk njohin asnjë strukturë paralele ndërsa ftoj deputetët të bashkohen.

“Farsa elektorale maj 2023, njërin prej aspekteve më të shëmtuara dhe kriminale kishte shkrirjen në një të bandave, të vrasësve dhe trafikantëve me Policinë e Shtetit në veprimin e tyre terrorizues, kriminal ndaj zgjedhësve dhe qytetarëve.

Bandat u bënë një apo ishin tërësisht nën ombrellën e policisë. Ndaj tyre, narkopolicia jo vetëm që nuk mori masa, por u mor me inskenime të turpshme për opozitarët, në një kohë kur kamionët me euro disponoheshin dhe qarkullonin në krahun e narkoqeverisë kundër zgjedhësve.

Në Shkodër, eksponentë tanë të PD u telefonuan nga banditët, u kërcënuan në mënyrën më të egër prej tyre, u ofruan gjer në 20 milionë lekë për komisioner, nga 10 mijë euro për komisioner.

Në Lezhë, nën mbrojtjen e Policisë së Lezhës, bandat shpërndanë para dhe terror gjatë gjithë natës në zonat e ndryshme të rrethit të Lezhës. Diku, diku janë të filmuara dhe aty duken makinat e bandave dhe makina e policisë që u rri në krahun tjetër për të garantuar veprimtarinë e tyre kriminale.

Bandat, në Peshkopi, ishin nën mbrojtjen e Ballukes, e cila shoqërohej me banditë. Dhe nga hoteli i Ymer Lalës drejtonte operacionet e tyre banditeske elektorale.

Bandat e kthyera nga Dubai, në Durrës dhe rrethe të tjera, në Elbasan dhe vende të tjera, diktuan nën mbrojtjen e policisë, vullnetin e qytetarëve.

Eksponentë të PD-së u bënë pre e atentateve të organizuara për eliminimin e tyre, në Vaun e Dejës, në Lezhë, etj.

Bandat pushtuan qendrat e votimit, siç është rasti i Velipojës. Në Mamurras, ato shpërndanë gjer në 600 euro votën. Të gjitha këto haptas, sepse kishin mbrojtjen e narkopolicisë.

Në Nikël, vrasës e trafikantë bllokuan qendrat e votimit, vunë në presion të madh komisionerët, kurse narkopolicia arrestonte një person me një makinë dhe e mashtronte opinionin publik shqiptar se ai po blinte vota, në një kohë kur ai nuk kishte as edhe një qindarkë me vete. Pavarësisht se nuk kishte në makinë asnjë qindarkë, komunikata e policisë thoshte se u kap duke blerë vota. Si e si të krijojnë zhurmën për blerjen e votave nga opozita dhe jo nga qeveria.

Edhe numri i policisë, atë ditë janë bërë qindra thirrje nga opozitarët. Policia ose nuk përgjigjej, ose u thoshte: paraqiteni me shkrim ankesën, në një kohë kur qendra e votimit ishte e pushtuar,” tha Sali Berisha duke shtuar se si kurrë në historinë e këtij vendi, administrata publike u shndërrua në një polici politike e procesit elektoral.

“Ky është aspekti policesk, por u them ju se një aspekt tjetër më i shëmtuar dhe më policesk, ka qenë roli i administratës publike.

Si kurrë në historinë e këtij vendi, administrata publike u shndërrua në një polici politike e procesit elektoral.

Së pari, në kundërshtim flagrant me ligjin janë vendosur komisionerë me qindra e qindra punonjës bashkie që do numëronin vota për ish-kryetarin apo kryetarin e tyre. Me ligj e ndaluar, me ligje palejueshme.

Aspekti tjetër, qindra e qindra punonjës të administratës janë vendosur komisionerë dhe numërues në qendrat e votimit. Aspekti më i shëmtuar është qëndrimi i zyrtarëve si gardianë në qendrat e votimit. Presioni që kanë bërë një muaj rresht mbi punonjësit e tjerë. Kërcënimet që ata kanë shpërndarë nëpërmjet punonjësve, dërgoheshin mesazhe në tatime, dërgoheshin mesazhe në dogana, që i thuhej iksit, biznesmen jo i vogël, se po shkove në votime ti dhe punëtorët e tu, do përballesh me këto pasoja.

Kujdestares së kopshtit se po nuk solle 10 karta identiteti, të nesërmen humbet punën. Kanë filluar që sot shkarkimet nga puna ndaj tyre që nuk u përgjigjën.

Administrata, eksponentë të administratës, u sollën në mënyrën më antiligjore në këtë proces. Drejtorë, si terrorist është sjellë kushëriri i Ballukes, Klosi në Peshkopi, ku për të mposhtur elektoratin, u vërsul me tërbim ndaj bizneseve 3 ditë para zgjedhjeve në inspektim të përgjithshëm.

Të njëjtën gjë kanë bërë në Konispol, Sarandë, Libohovë, Këlcyrë dhe një seri bashkish të tjera.

Kurrë ndonjëherë në historinë e këtij vendi, administrata shtetërore, nuk ka mbajtur një qëndrim të tillë kriminal ndaj procesit zgjedhor,” tha lideri i opozitës duke i bërë thirrje thirrje medieve të shohin rezultatin e partisë së Tom Doshit, dëshmia më e zezë dhe më e turpshme e blerjes së votës.

“Solla këtu karakterin stil Putin të këtyre zgjedhjeve, i cili u gërshetua me karakterin e shtetit mafioz.
Industria e blerjes së votës ishte një industri në pronë të narkoqeverisë dhe narkotrafikantëve dhe oligarkëve.

Unë u bëj thirrje medieve që janë në një orë të zezë në raport me publikun shqiptar, me qëllim ose verbërisht po bëjnë apologjinë e këtij krimi monstruoz ndaj shqiptarëve.

Ata punonjës të medieve, që kanë minimumin e ndërgjegjes profesionale, i ftoj për një moment të hedhin sytë në hartën elektorale, në rezultatet elektorale dhe do gjejnë se partia e Doshit është tullumbacja më e madhe e këtyre zgjedhjeve.

Partia e drejtuar nga një njeri që nuk ka njeri prej jush që të mbajë mend një fjalë politike të shqiptuar prej tij, se ai flet vetëm me gjuhën e parave.

Të jeni të sigurt se Rama ka përdorur shumëfishin e tij. Ju bëj thirrje punonjësve të medias, shikoni rezultatin e partisë së Doshit, dëshmia më e zezë, më e turpshme e blerjes së votës.

Flet vetë. 13 milionë euro ka fituar vetëm një ndërmarrje të shtetit Tom Doshi. 13 milionë euro nga Edi Rama.

Nëse ndokush mendon se vota për partinë e Tom Doshit është kontestatore, gabon rëndë. Është thjesht votë e blerë. E keni parë të bëjë fushatë? Unë asnjëherë nuk e kam parë. Ka bërë një darkë nderimi për Nikulajn dhe aty bëri sulme politike. Berisha tha donte ta politizonte. Unë në fakt, çdo këshilltar po u vra në fushatë, ka një karakter të papranueshëm. E vetmja fushatë e aleatit të Ramës, Tom Doshi ishte një sulm ndaj Berishës dhe vetëm para dhe para.

E them këtë sepse mjafton që një gazetar të shkojë në Mamurras dhe të pyesë qytetarët si votuan. Mjafton që një qytetar të shkojë në Blinisht, të shkojë në Klos. Ndjej keqardhje të thellë kur përpiqen të injorojnë aktet e blerjes masive.

A e dini që janë mbledhur kartat e pensionistëve se do u duhen për shpërblimin? Dy javë para. Janë mbledhur kartat e identitetit të invalidëve. Ne kemi dokumente, nuk bëjmë asgjë pa dokumente. Nuk bëjmë asnjë sulm të padokumentuar.

Ne po mbledhim dhe do vazhdojmë të mbledhim dokumente për strategjinë e mbrojtjes së votës.
Mbrojtja e votës është objektivi më madhor i yni,” tha Kryetari i Partisë Demokratike duke premtuar se Statuti i PD do zbatohet dhe analiza do jetë e plotë, por fillimisht do të mbrohet vota.

“Problemi i karriges është i zgjidhur me statutin e PD-së. Kryetari që humbet zgjedhjet, kalon në votëbesim.

Kjo do ndodhë edhe me zgjedhje të vjedhura. Unë nuk kam nevojë për asnjë lloj alibie se statuti do të zbatohet pikë për pikë.

E gjithë përpjekja ime bëhet si një detyrim ndaj demokracisë dhe ndaj të gjithë atyre qytetarëve që kanë votuar kundër sistemit ose që kanë pasur frikë të votojnë ndaj tij.

Një shoqëri që nuk zhvillon zgjedhje të lira, nuk ka të ardhme.

Në këtë kontekst, konstatoj me keqardhje, por jo i dekurajuaj, se si makineria propagandistike ka penetruar në studiot televizive, që nga mëngjesi deri në darkë, përpiqen t’i paraqesin shqiptarëve apo të vënë në diskutim votëblerjen ose përjashtimin e 180 mijë votuesve, të vënë në diskutim mbledhjen e kartave, të vënë në diskutim ndërhyrjen e krimit.

Në këtë diskutim, këta kërkojnë të vënë në narkozë shoqërinë dhe të legjitimojnë aktin makabër të një njeriu, që publikisht para shqiptarëve dhe botës, e deklaroi Kodin Zgjedhor një kinezëri.

Ndaj dhe u bëj thirrje shqiptarëve, përbuzeni me përçmim të shpifur kundër jush, kundër interesit të secilit prej jush që bëhet me paga marramendëse të narkoqeverisë, e cila pasi bleu zgjedhjet, kërkon tani të shesë mashtrimin e saj.

Çdo natë, siç dëgjoni ju, fajin e ka opozita.

Analiza e PD-së në të gjitha nivelet, për të gjithë problematikën, për të gjitha përgjegjësitë, do bëhet më transparente dhe më e fortë se asnjëherë tjetër, me qëllim përsosjen e punës për një reformim të mëtejshëm të kësaj force politike.

Çdo demokrat duhet ta dijë se kjo është detyrimi ynë madhor para çdo zgjedhësi shqiptar. Por për kohën që ne mbrojmë votën, të gjitha energjitë tona janë të përqendruara në mbrojtjen e votës.

Dhe ky nuk është një proces i lehtë. Duhet ta dini se ka njerëz që për një provë, luajnë me kokën e tyre. Ky është një regjim bande, është një narkoshtet që nuk respekton asnjë rregull.

Në fund, për zgjedhjen e Gazment Bardhit si Kryetar të ri të Grupit Parlamentar nga ana e mbështetësve të Lulzim Bashës, Kryetari i Partisë Demokratike, Sali Berisha e bëri të qartë se nuk njohin asnjë strukturë paralele ndërsa ftoj deputetët të bashkohen.

“Nuk kam asnjë koment për këtë, përveç komentit që unë ftoj të gjithë deputetët e PD të bashkohen dhe të vazhdojmë betejën për zgjedhjet e lira.

Ne nuk mund të njohim asnjë lloj strukture paralele të PD. Ne i ftojmë të gjithë deputetët të ulen, të diskutojnë.

Ne jemi të hapur ndaj tyre, por ka rregulla, ka statute.”