Fatkeqësia e Shqipërisë në këtë mot, Berisha: Edi Rama dhe ministrat e tij hajdutë!
Me përkeqësimin e moti dhe zgjerimin e zonave të përmbytura nga veriu në jug, ka reaguar Kryetari i Partisë Demokratike, Sali Berisha duke akuzuar Kryeministrin Edi Rama si fatkeqësinë e vërtetë të Shqipërisë së bashku me ministrat e tij hajdutë.
“Jam këtu për të denoncuar me forcën më të madhe, qëndrimin e papërgjegjshëm të qeverisë, e cila sillet sot si një organizatë e papërgjegjshme dhe ka lënë Shqipërinë një vend tërësisht të braktisur.
Nga jugu në veri, rrugë të bllokuara, jetë të humbura, për shkak të infrastrukturës mesjetare, shembje masive për shkak të vjedhjes së fondeve në skarpate, rrënime të investimeve të bëra dhe dy vjet më parë.
Shqipëria nuk pati një mot të madh dhe nuk ishte moti i madh, fatkeqësia e saj.
Fatkeqësia e vërtetë e Shqipërisë në këtë mot ishte Edi Rama dhe ministrat e tij hajdutë dhe të papërgjegjshëm për detyrën që kryejnë, tha Sali Berisha duke shtuar ae ata u zhdukën dhe përveç Facebookut të Edi Ramës, nuk ka funksionuar asgjë.
“Duke shprehur solidaritetin tim të plotë me të gjitha zonat e dëmtuara, me banorët e Shkodrës, që u përmbytën nga digat, duhet të kesh logjikën e harbutit, të hapësh portat e tre liqeneve të kaskadës dhe të deklarosh se Shkodra dhe Nënshkodra nuk u përmbytën nga kaskada,” tha Kryetari i Partisë Demokratike duke akuzuar Edi Ramën se përmbyti Shkodrën, por nuk e pranon fajin:
“Vetëm e vetëm se duhet të dëmshpërblesh për çdo metër katror të përmbytur nga diga.
Katastrofë ishin përmbytjet në Lezhë, dhe vetëm pasi ikën ujëra, u bë i gjallë Pjerini. Shkoni e shihni inaugurimet e dy viteve më parë në Kune, se si i mori shiu i parë,” tha Kryetari i PD, Sali Berisha, duke shtuar se për këtë qeveri, shqiptarët nuk ekzistojnë, ose ekzistojnë për vjedhjen e taksave të tyre, ndërsa përfundoi:
“Edhe njëherë, dënoj me forcën më të madhe, qëndrimin e papërgjegjshëm ndaj kësaj situate dhe theksoj se fatkeqësia më e madhe nuk ishte ajo natyrore, por qëndrimi i qeverisë së Edi Ramës ndaj kësaj fatkeqësie.”
