Fatmir Shehollit i vazhdohet paraburgimi edhe për dy muaj

Gjykata Themelore e Prishtinës ia ka vazhduar paraburgimin edhe për dy muaj Fatmir Shehollit, i cili u arrestua si i dyshuar për spiunazh, për llogari të shtetit të Serbisë.

“Ju njoftojmë se pas kërkesës së Prokurorisë Speciale të Republikës së Kosovës për vazhdimin e masës së paraburgimit në çështjen penale ndaj të pandehurit F.SH., gjyqtari i procedurës paraprake pas shqyrtimit të kërkesës, me datë 07 nëntor 2025 përmes Aktvendimit ka aprovuar kërkesën e PSRK-së, ashtu që të njëjtit iu është vazhduar masa e paraburgimit në kohëzgjatje prej 2 (dy) muaj,” tha zëdhënësja e Gjykatës Themelore të Prishtinës , Mirlinda Gashi..

Ndryshe, Fatmir Sheholli u arrestua më 09 tetor nën dyshimet për spiunazh. Ndaj tij, më 10 tetor Gjykata e Prishtinës i caktoi masën e paraburgimit në kohëzgjatje prej një muaji.

Fatmir Sheholli dyshohet se për një kohë ka vepruar sipas udhëzimeve të urdhrave të zyrtarit të lartë të shërbimit sekret serb, BIA, Bojan Dimiç.