Fëmijët në Gaza po vdesin nga uria! “Gjendja mund të përkeqësohet”
Ministri palestinez i Shëndetësisë tha sot se 29 fëmijë dhe të moshuar kanë vdekur nga uria në Gaza ditët e fundit dhe se mijëra të tjerë janë në rrezik për jetën.
Ndihmat pritet të fillojnë të arrijnë në Gaza sot, pasi Izraeli lëshoi kamionët e parë pas një bllokade 11-javore, por zyrtarët palestinezë dhe ata të ndihmave humanitare thonë se kjo është vetëm një “pikë në oqean” e asaj që nevojitet dhe se gjendja mund të përkeqësohet.
“Në ditët e fundit, kemi humbur 29 fëmijë,” tha ministri palestinez i Shëndetësisë, Majed Abu Ramadan, duke i përshkruar ato si “vdekje të lidhura me urinë” ndërsa sqaroi se numri i përgjithshëm përfshin edhe të moshuarit.
14.000 foshnje mund të vdesin
Duke komentuar deklaratat e mëparshme të shefit të ndihmave humanitare në OKB se 14.000 foshnje mund të vdisnin pa ndihmë, tha se shifra ishte “shumë realiste” dhe “madje mund ta nënvlerësojë shkallën e katastrofës humanitare”.
Izraeli vendosi një bllokadë mbi të gjitha furnizimet në muajin mars, duke thënë se Hamasi po i sekuestronte furnizimet, një pretendim që grupi militant e mohon. Më herët këtë muaj, një monitorues global tha se gjysmë milioni njerëz në Rripin e Gazës po përballeshin me urinë.
Abu Ramadan tha se vetëm shtatë ose tetë nga 36 spitalet e Gazës funksionojnë pjesërisht dhe se më shumë se 90 për qind e furnizimeve mjekësore janë tani në zero për shkak të bllokadës.
“Informacioni im është se shumë pak dërgesa kanë hyrë në Gaza, rreth njëqind kamionë në zonat jugore dhe qendrore”, tha ai ndërsa i pyetur nëse kishte ndonjë furnizim mjekësor midis tyre, ai tha:
“Për aq sa di unë… është vetëm miell për furrat e bukës!”
