Ferizaj, kapen 200 kg marijuanë nga Shqipëria
Policia e Kosovës, PK, përmes Drejtorisë për Hetimin e Trafikimit me Narkotik të Ferizajt dhe në asistencë të njësiteve për reagim të shpejtë, pas një hetimi disa mujor, ka realizuar një operacion të suksesshëm policor i cili ka rezultuar me kapjen e mbi 200 kg marijuanë dhe arrestimin e gjashtë personave .
Ky operacion është realizuar nën urdhërin dhe bashkëpunimin e ngushtë me Prokurorinë Themelore Ferizaj, Departamenti për krime të Rënda, pasi është vazhdimësi e hetimeve që ndërlidhet me një operacion policor të realizuar në tetor të vitit 2018.
Si rezultat i vazhdimit të hetimeve intensive me 09.02.2019, në dy lokacione të Ferizajt është realizuar kontroll policor, i cili ka rezultuar me arrestimin e personave të dyshuar, se kanë vepruar si grup kriminal të përfshirë në veprën penale “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge”.
Gjatë këtij operacioni policor është konfiskuar një sasi e konsiderueshme e substancave narkotike e llojit marijuanë e mbështjellë në 193 pakove, e cila pas matjes ka rezultuar të jenë 209.202 kg. Marijuana dyshohet me prejardhje nga Shqiperia.
Gjatë këtij operacioni policor janë arrestuar gjashtë personat e dyshuar:
- XH.S. viti i lindjes 1990, shqiptar, kosovar;
- B.S. viti i lindjes 1978, shqiptar, kosovar;
- G.K. viti i lindjes 1991, shqiptar, kosovar;
- F.B. viti i lindjes 1992, shqiptar i Maqedonisë
- J.B. viti i lindjes 1997, shqiptar i Maqedonisë
- F.B. viti i lindjes 1994, shqiptar i Maqedonisë
Në këto lokacione përveç konfiskimit të substancës narkotike, në cilësi të provave materiale janë gjetur dhe konfiskuar edhe;
- Katër makina (pasat, Venta, Golf IV dhe Sharan)
- Para kesh 839 euro e 95 cent
- Para kesh 520 denar Maqedonas,
- Para kesh 3 dollar Amerikan dhe
- Gjashtë telefona celular
Ndryshe, gjatë operacionit të parë policor të realizuar në tetor të vitit 2018, u konfiskuan 108 kilogramë e 13.3 gramë substancë e dyshuar narkotike e llojit marijuanë. Mbrëmë janë konfiskuar 193 pako në sasi prej 209.202 kg. ku totali rezulton të jetë rreth 317 kilogram.
