Ferizaj, task-forcë për menaxhimin e situatës pas stuhisë dhe breshërit

Komuna e Ferizajt ka njoftuar qytetarët se pas reshjeve të dendura të shiut dhe breshrit, Kryetari Agim Aliu ka krijuar task-forcën për menaxhimin e kësaj situate.

Task-forca do të udhëhiqet nga Aliu, ndërsa përbëhet edhe nga drejtues të shërbimeve publike, gjegjësisht emergjencave civile, drejtues të bujqësisë dhe pylltarisë, zjarrfikësit si dhe përfaqësues të tjerë të organeve shtetërore që kanë autorizimet për trajtimin e situatave në rastet e fatkeqësive natyrore..

Sipas njoftimit për media, Aliu dhe bashkëpunëtorë të tjerë kanë dal menjëherë në terren për të parë nga afër dëmet e shkaktuara nga stuhia e shiut dhe breshrit me ç’rast kanë vizituar Spitalin e Ferizajt, zona të përmbytura në disa nga rrugët e qytetit dhe fshatrave.

Ndryshe, një mot me stuhi breshëri ka përfshirë Ferizajn rreth orës 15:00. Për afro 20 minuta breshëri në madhësi të kokrrave të arrës ka shkaktuar dëme në kultura bujqësore dhe pemë.