Ferizaji me 4 hyrje-dalje në Autostradën “Arbën Xhaferi”

Ekonomia dhe qytetarët e Ferizajit kanë një arsye më shumë t`i gëzohen investimeve në këtë komunë. Tashmë do të kenë edhe dy kyçje për Autostradën “Arbën Xhaferri” duke çuar në 4 numrin e hyrje-daljeve nga qyteti i Ferizajit.

Për këtë, i pari i Ferizajt, Agim Aliu duke njoftuar se tashmë Ministria e Infrastrukturës ka nisur procedurat e nevojshme të prokurimit për këto investime, tha se këto kyçje dhe ky investim dinamizon edhe më shumë jetën biznesore dhe i jep dimension e rëndësi të re ekonomisë e qytetit tonë, si nyje e rëndësishme e ekonomisë rajonale.

“Është lajm i pritur për një kohë të gjatë, është një përpjekje që është bërë për një kohë të gjatë që të vihet drejtësia në vend, sepse kyçjet që ishin paraparë për Ferizajn ishin një lloj padrejtësie. Si rezultat i këmbëngulësisë sonë do të kemi dy kyçje të reja, por kërkesa jonë kryesore ka të bëjë me vazhdimin e rrugës “Driton Islami”, por në të njejtën kohë është realizuar edhe kërkesa që ka të bëjë me fshatin Gërlicë që poashtu paraqet një rëndësi të veçantë për Ferizajn dhe duke pasur parasysh gjithë këto kyçje, praktikisht Ferizaj shndërrohet në kyçje të autostradës në katër pika, duke marr parasysh edhe kyçjen që ka qenë në Bibaj që do t’i shtohet rëndësia, sepse ne kemi planifikuar dhe është në përfundim e sipër procedura e prokurimit ndërtimi i rrugës me katër korsi nga ura në Bibaj deri tek kyçja në autostradë që shton rëndësinë, sikurse edhe ajo kyçje me vazhdimësinë e rrugës “Driton Islami” tha mes tjerash i pari i Ferizajt, Agim Aliu.

Këto projekte, pritet që të kenë ndikim të drejtpërdrejt në rritjen e ekonomisë lokale, qarkullimin e njerëzve, kapitalit dhe mallrave në rrugë rajonale e ndërshtetërore.