Fermerët e Korçës në protestë: Po na bllokojnë produktet e ardhura nga Serbia!

Rreth 15 mijë tonë mollë e Zvirinës që ka mbetur stok, detyroi fermerët të dalin në protestë mëngjesin e sotëm duke bllokuar aksin nacional Korçë-Pogradec.

Fermerët e fshatit Zvirinë thonë se molla e tyre ka mbetur pa shitur për shkak të hyrjes së mollës nga importi, kryesisht nga Serbia.

Në këtë protestë të paralajmëruar në kryqëzimin e fshatit Zvirinë ka dhe forca policie për të kontrolluar situatën.

Ndryshe, grumbulluesit e mollës thonë se shkak pse ky fryt ka mbetur në frigoriferët e juglindjes së vendit pa u shitur është grumbullimi i bërë me çmim të lartë në sezon si dhe importi i mollës.