Ferronikeli dhe Samir Mane/ Pas një viti sqarohet blerja e dyshimtë: BERZH e lumtur që i jep 25 milionë euro Samirit!

Një vit më parë, mediat në Kosovë mbyllën gojën dhe as Balfin e as Samir Mane nuk sqaruan blerjen e dyshimt të Ferronikelit si dhe dokumentet që ishin publikuar. Por kjo nuk i pengoi Samir Manes të vazhdoi punën e tij dhe blerjet në vijimësi, madje në fillim të këtij viti Banka e Shqipërisë i miratoi edhe blerjen e Tirana Bank me 57.2 milionë euro ku Samir Mane gëzon 88.95 % të aksioneve.

Dhe, deri sa hijet e dyshimit mbi procesine e blerjes nga Samir Mane e mbulojnë Ferronikelin dhe veprimtarinë e tij, njeriu që bleu 6 muaj më parë një bankë, sot në emër të investimeve në Ferronikel merr nga BERZH-i deri sot i përfolur por jo më, 25 milionë euro. Dhe jo vetëm kaq! Drejtori i Bankës Evropiane për Rindërtim dhe Zhvillim, BERZH, për Burime Natyrore, Eric Rasmussen, tha se BERZH-i është i lumtur që do të bashkëpunojë me kompaninë Balfin!

Pse u bë kaq i lumtur BERZH kur i jep kredi një kompanie të blerë me shumë të panjohura, dhe si jepen 25 milionë euro për një kompani e cila 13 vjet më parë ishte blerë nga Agjencia Kosovare e Privatizimit 30.5 milionë euro. Blerje për të cilën poashtu janë ngritë shumë akuza!

Ja çfarë u tha një vit më parë për blerjen e Ferronikelit nga Balfin i Samir Manes dhe si erdhi deri tek vendimi i Bankës Evropiane për Rindërtim dhe Zhvillim, BERZH. 

Dokument/ Samir Mane fillon edhe blerjen e Kosovës, “NKL Limited” blenë fabrikën Ferronikel…

Kudo ku ka blerje të  mëdha nëpër Shqipëri përmendet Samir Mane. Por ai nuk u mjaftua me kaq,  kaloi kufirin dhe u paraqit në  Maqedoni, në  krah të çdo shtetari të lartë maqedon dhe jo vetëm, dhe kishin të drejtë të gjithë ata që pyesnin dhe pyesin, kush është ky Samir Mane?!

E deri sa pyetjet dhe pikëpyetjet vazhduan, ai vazhdoi me bizneset e tij me pajisje eletrike, qendra tregtare, fshatëra turistik, miniera, ndërtime, për tu paraqitur vitin e kaluar edhe me një blerje të madhe në Kosovë; Të një kompanie e cila është përfolur në momentin e parë që u fut në duart e AKP-së, fabrikës “Ferronikel”në Drenas.

U fol shumë për mënyrën e shitjes së parë, në atë kohë ishte një biznesmen nga Tirana që akuzoi krerët e shtetit të Kosovës për ryshfet dhe keqpërdorime por blerësi u zyrtarizua përkundër akuzave.

Një vit më parë PaFrike duke iu referuar Indeksonline raportonte se aktualisht kjo fabrikë me 13 mars ka ndalur prodhimin për shkaqe financiare. Ndërsa, janë rreth 820 punëtorë e 250 kontraktorë që mbajnë familjet nga kjo kompani.

Dhe, Kompania e quajtur “NKL Limited”me bazë në Londër, sipas Indeksonline, zyrtarisht është blerësi i fabrikës “Ferronikel” në Drenas.

Në një njoftim të Autoritetit Kosovar të Konkurrencës thuhet se është marr vendimi që kompanisë NKL Limited  t’i lejohet përqendrimi përmes përfitimit 100% të kontrollit të në Ferronikel pas blerjes së aksioneve.

“1. LEJIMIN, e Përqendrimit përmes përfitimit 100% të kontrollit nga NKL Limited, në cilësinë e blerësit mbi NewCo Ferronikeli Complex LLC-Cunico, në cilësinë e shitësit. Transaksioni i propozuar është transaksion që nuk ka efekt në tregun gjeografik të Republikës së Kosovë, por vetëm në atë ndërkombëtar. Nga transaksioni nuk do të rezultojnë efekte negative për konkurrencën e rrjedhimisht për konsumatorët në Republikën e Kosovës”, thuhet në këtë vendim të AKK-së, transmeton Indeksonline.

“Autoriteti Kosovar i Konkurrencës me datë  25.05.2018 ka pranuar kërkesën për njoftim të Përqendrimit të ndërmarjeve të realizuar si pasojë e blerjës së aksioneve të NewCo Ferronikeli Complex LLC me nr. 70268073 me adrese: Rruga Besim Mala 227,13000 Drenas, Republika e Kosovës nga ana e NKL Limited me seli në Mbretërin e Bashkuar , e regjistruar  me nr. identifikimi  11246593 me adresë: Broadgate Tower, 20 Primrose Street, London EC2A 2EË, përmes përfitimit të kontrollit të plotë me 100% të aksioneve.

2. Subjekt i Përqendrimit sipas  përshkrimit të kërkesës nuk do të ketë efekt mbi konkurrencën në Republikën e Kosovës, rrjedhimisht nga ky transaksion nuk do të rezultojnë efekte negative për operatorët ekonomik apo konsumatorët në Republikën e Kosovës, duke marrë parasysh së Blerësi nuk është i pranishëm në tregun e Republikës së Kosovës nëpërmjet të personit juridik apo shitjeve. Ky transaksion nuk krijon pozitë të re dominuese ose ndryshime në tregun e Kosovës” theksohet tutje në një njoftim, transmeton Indeksonline.

Më herët u raportua se njeriu me i pasur në Shqipëri, Samir Mane është në negociata për të blerë këtë fabrikë.

Mirëpo, në një kërkim të Indeksonline, kuptohet se drejtori i NKL Limited (Kompania që  e ka blerë fabrikën) është vet Samir Mane.

Në faqen ‘Beta Companies House’ në të dhënat për kompaninë që e ka blerë Ferronikelit, merret vesh që  drejtor është Mane dhe disa të  tjerë të  cilët mund t’i shihni më  poshtë.

Siç shihet në këtë dokument, biznesmeni Mane është bërë drejtor i NKL Limited para tri dite, përkatësisht me 18 korrik, domëthënë është bërë drejtor pas blerjes së Ferronikelit.

Fakte të reja për përfshirjen e dyshimtë të Samir Manes në blerjen e “Ferronikelit”

Një ditë pas këtij raportimi të PaFrikë, më 23 korrik 2018, dalin fakte të reja për përfshirjen e dyshimtë të Samir manes në blerjen e “Ferronikelit”.

Biznesmeni dhe oligarku, Samir Mane është emëruar drejtori i kompanisë, “NKL Limited”, kompani kjo e cila zyrtarisht ka blerë gjigantin metalurgjik “Feronikel”. Në dokumentet të cilat i ka siguruar Gazeta Insajderi në Prishtinë, Mane është emëruar në krye të kësaj kompanie, tre muaj pasi zyrtarisht është shitur “Feronikel”.

Dhe jo vetem kaq. Dy pronarët e kompanisë “NKL Limited”, Joyce Angelina Young dhe Jacques Claude Michel Nassieu Maupas, kanë qenë Anëtar Bordi të kompanisë “Cunico Resources”, kompani kjo e cila e falimentoi “Feronikelin”.

Falimentuesit e “Feronikelit” në bordin e Samir Manes

Samir Mane i cili është njëri nga njerëzit më me ndikim në Shqipëri dhe njihet si një nga biznesmenët më të mëdhenj në Shqipëri dhe rajon është emëruar, drejtor i kompanisë britanike, “NKL Limited”, kompani kjo e cila zyrtarisht ka blerë Ndërmarrjen Shoqërore, “Feronikel”.

Kompania “NKL Limited”, e cila është duke figuruar si blerësi kryesor i Feronikel-it, është kompani me një jetë shumë të shkurtër. Sipas disa dokumenteve zyrtare të cilat i posedon Gazeta Insajderi, “NKL Limited” është themeluar më 10 mars të këtij viti, [2018] me bazë në kryeqytetin britanik, Londër. Aktualisht në krye të saj ekzistojnë tre drejtorë aktivë pa asnjë sekretarë, shkruan Insajderi.

Mane i cili është një nga biznesmenët më të mëdhenj në Shqipëri dhe pronarë i një numri të madh të bizneseve në Shqipëri, në Austri, Maqedoni, Kosovë, Mal të Zi, Itali, Dubai, SHBA dhe Greqi, u emërua më 18 korrik 2018, drejtor në “NKL Limited”, ku ndikimi i tij pritet të zgjerohet edhe më shumë në shtetin e Kosovës.

Mane pritet që të marr në timonin e menaxhimit të Ndërmarrjes Shoqërore, “Feronikel”, së bashku me dy pronarët e tjerë të kësaj kompanie.

Mirëpo nuk është vetëm kjo. Dy pronarët e kompanisë “NKL Limited”, Joyce Angelina Young dhe Jacques Claude Michel Nassieu Maupas, kanë qenë Anëtar Bordi të kompanisë “Cunico Resources”, kompani kjo e cila e falimentoi “Feronikelin”.

Dokumentet e siguruara nga Gazeta Insajderi tregojnë që transaksioni i shitjes së “Cunico Resources”, dyshohet se është manipulativ.

Në komapninë blerëse, “NKL Limited”, janë dy njerëz të cilët kanë qenë në Bordin Udhëheqës të “Cunico Resources” që e ka pasur deri tash në pronësi “Feronikelin”. Kjo i bie që “Cunices Resources”, në mënyrë manipulative ia ka shitur vetes “Ferronikelin” për t’i ikur borxheve që ka krijuar duke e pasur në pronësi deri tash.

Kompania “Cunico Resource” , e cila në tetor të vitit 2007 mori nën menaxhim gjigantin metalurgjik “Feronikel” në Kosovë dyshohet për një skemë mashtrimi që kishte bërë në Maqedoni, duke dëmtuar “Feni Industries” në vlerë prej mbi 50 milionë dollarë.

Kompania “NKL Limited”, sipas Autoritetit Kosovar të Konkurrencës (AKK), bleu “Feronikelin” tre muaj pas themelit të saj, më 22 qershor 2018, ndërsa tre muaj pasi “Feronikel” është shitur zyrtarisht, oligarku Samir Mane u emërua drejtor në këtë kompani.

“Përqendrimi përmes përfitimit 100% të kontrollit nga “NKL Limited”, në cilësinë e blerësit mbi “NewCo Ferronikeli Complex LLC-Cunico”, në cilësinë e shitësit. II. Parashtruesi i Njoftimit për Përqendrim obligohet të paguaj taksën administrative për Autorizimin lidhur me Realizimin e Përqendrimit në përputhje me Nenin 20 të Ligjit Për Mbrojtjen e Konkurrencës, dhe neni 20 të Udhëzimi Administrativ Nr.06/2012, bëhet kundrejt pagesës në vlerë prej 3,000.00 € me shkronja ( tre mijë euro )”, thuhet në vendimin e AKK.

Ata që i shitën vetes “Ferronikelin”

Gazeta Insajderi, gjatë vitit 2017 kishte raportuar për këtë mashtrim milionë dollarësh të drejtorit të kësaj kompanie, Yusuf Mirakhmedov.

Mirakhmedov dyshohej se ishte fshehur në Uzebekistan pasi që shteti maqedonas ishte në kërkim të tij, ndërsa shteti i Kosovës nuk jepte asnjë përgjigje për situatën që ishte në “Feronikel” dhe pasojat qe mund të ketë shkaktuar i arratisuri Mirakhmedov në gjigantin metalurgjik në Kosovë.

Drejtoria e Policisë Financiare kishte ngritur kallëzim penal kundër Mirakhmedov në Prokurorinë Publike të Veles. Dyshohej se ish-drejtori i “Feni Industries” kishte kryer veprën penale të keqpërdorimit të pozitës dhe autoritetit zyrtar.

“Feni Industries” në Kavadar dhe “Cunico Marketing” në Dubai kishin pasur raporte afariste për një periudhë trevjeçare. Kompania nga Dubai blinte xehet e kompanisë maqedonase.

Borxhi i kompanisë nga Dubai kishte arritur vlerën e mbi 51 milionë dollarëve. Në skenë ishte shfaqur Mirakhmedov. Kishte marrë vendim që të shlyejë borxhin e kompanisë nga Dubai. Veprimi i tij dëmtoi gjigantin metalurgjik maqedonas.

“Në tetor të vitit 2016,Yusuf Mirakhmedov kishte vendosur për shlyerjen e kërkesave në shumën prej 51,505,526 USD, bazuar në shitjen e nikelit, personit juridik “Cunico Marketing” nga Emiratet e Bashkuara Arabe – Dubai”, ka thënë për Insajderin, Arafat Muaremi, drejtor i Policisë Financiare në Maqedoni.

Sot, BERZH ofron 25 milionë euro kredi për investime në Ferronikel

Sot, RFE raporton se Banka Evropiane për Rindërtim dhe Zhvillim, BERZH, ka njoftuar se do të ofrojë 25 milionë euro kredi për investime në kompaninë, NewCo Ferronikeli.

“NewCo Ferronikeli Complex LLC”, një nga operatorët më të mëdhenj në fushën minerare dhe metalurgjike në Ballkan ​është blerë nga Grupi Balfin.

Samir Mane, themelues dhe pronar i kompanisë Balfin tha se është krenar për të vazhduar historinë e bashkëpunimit me BERZH-in.

“Investimet që do të bëjmë te Ferronikeli do të sigurojnë se ai mbetet një prodhues konkurent i nikelit në ekonominë globale dhe vazhdon të gjenerojë vende të punës në Kosovë.”

Ndërsa Drejtori i BERZH-it për Burime Nayrore, Eric Rasmussen, është shprehur se “BERZH-i është i lumtur që do të bashkëpunojë me kompaninë Balfin për rimëkëmbje të Ferronikelit, që është i rëndësishëm për Kosovën dhe komunitetin lokal”.

Ndërkohë RFE raporton se kjo kompani kishte ndërprerë prodhimin për një periudhë vitin e kaluar, për shkak të problemeve financiare me të cilat është ballafaquar pronari i mëhershëm. Pronar i cili në vitin 2006 e kishte blerë Ferronikelin për 30.5 milionë euro. Kurse zotimet për 20 milionë euro investime në 3 vjetët e para, blerësi i kishte përmbushur dhe tejkaluar madje për investime dhe punësim. Madje pas kësaj performance, bordi i Agjencisë Kosovare të Privatizimit, në vitin 2009, kishte vendosur që këtë ndërmarrje ta lirojë nga monitorimi dhe raportimi i mëtutjeshëm për investime dhe punësim. Dhe, është po ky blerës që iu fut kalvarit të shitjes deri në duart e Samir Mane siç u sqarua më sipër.

Në fund, kur Samir Mane tashmë është pronar me shumë të panjohura i Ferronikelit dhe me asnjë të panjohur për blerjen e Tirana Bank, e rëndësishme është që BERZH-i është i lumtur që do të bashkëpunojë me kompaninë Balfin për rimëkëmbje të Ferronikelit, edhe pse mashtron kur thotë se është i rëndësishëm për Kosovën dhe komunitetin lokal. I tillë ishte në njëfarë mase deri në vitin 1989, dhe pasi i fut duart Sllobodan Millosheviçi dhe të gjithë të tjerët pas tij, ai kurrë më nuk i shërbeu as Kosovës dhe komunitetit, ashtu siç nuk po shërben as sot në prag të lumturimit të Bankës Evropiane për Rindërtim dhe Zhvillim, BERZH.