Festivali i 58-të i RTSH/ Reagim, ALBAUTOR: Po cenohet ruajtja e vlerave artistike kombëtare!

Me fillimin e Festivalit të 58-të të Radio Televizionit Shqiptar, me skenografi të Patrizia Bokonit, drejtorit të fotografisë Marcello Jazzeti, dhe Audios nga Emanuele Donini, ndonëse drejtueset artistike të Festivalit janë shqiptaret, Vera Grabocka dhe Alketa Vejsiu, ka reaguar Asambleja e Agjencisë Kolektive e të Drejtave të Autorit, ALBAUTOR, duke dhënë alarmin se po cenohet ruajtja e vlerave artistike kombëtare.

“Ne, të gjithë autorët anëtarë dhe përfaqësues të asamblesë së Agjencisë ALBAUTOR, e ndjejmë tashmë të detyrueshme që të shprehim publikisht shqetësimin tonë të madh në lidhje me mënyrën e organizimit të Festivalit të 58-të të Radio Televizionit Shqiptar këtë vit, duke qenë
se ruajtja e vlerave artistike kombëtare po cenohet haptas nga interesa të ngushta të një grupi të kufizuar njerëzish,” thekson Asambleja e Agjencisë “ALBAUTOR” përmes një deklarate ku renditë faktet shqetësuese lidhur me kriteret e pranimit të këngëve, ftesës së fshehtë në festival të kompozitorë me shtetësi jo shqiptare, moslejimit të krijuesve shqiptarë për pjesëmarrje në festivalet analoge, cenimit të elementit i cili i jep këngës fizionominë e muzikës tradicionale shqiptare, mungesës së ftesës për dhjetëra kompozitorë të suksesshëm shqiptarë dhe ftesën për ata të huaj që nuk kanë më shumë se dy këngë, heqjes së titullit orkestrues muzikor të këngës si dhe faktin që RTSH nuk paguan asgjë për detyrimin që ka në zbatim të ligjit të së drejtës së autorit.

Në fund, për shqetësimet e parashtruara, autorët anëtarë dhe përfaqësues të Asamblesë së Agjencisë ALBAUTOR theksojnë se janë të detyruar të gjithë së bashku, si krijues dhe autorë, të ngrenë zërin kundër këtyre fakteve abuzive, duke kërkuar unanimisht marrjen e masave për ndryshimin e kësaj situate shqetësuese dhe të një kontrolli financiar të festivalit të 58 të këngës në RTSH.

Ndryshe, mbrëmë në natën e parë të Festivalit të 58-të të Radio Televizionit Shqiptar u paraqitën 10 këngët e para nga 20 këngë sa janë gjithsej në konkurrim.

Deklaratë

Ne, të gjithë autorët anëtarë dhe përfaqësues të asamblesë së Agjencisë Albautor, e ndjejmë tashmë të detyrueshme që të shprehim publikisht shqetësimin tonë të madh në lidhje me mënyrën e organizimit të Festivalit të 58-të të Radio Televizionit Shqiptar këtë vit, duke qenë
se ruajtja e vlerave artistike kombëtare po cenohet haptas nga interesa të ngushta të një grupi të kufizuar njerëzish.

1.Si asnjëherë më parë në 57 Festivale të R.T.SH. kriteret e pranimit të këngëve janë ndryshuar në fund të fazës së pranimit duke vendosur kritere të reja të papublikuara në media dhe të ndryshme nga të gjithë festivalet e kaluara.

2.Në mënyrë të fshehtë janë ftuar në festival kompozitorë me shtetësi jo shqiptare, duke cenuar një ndër parimet më të rëndësishme të festivalit dhe duke shkelur rëndë dinjitetin e kompozitorëve shqiptarë, të cilët kanë arritur suksese të shkëlqyera në festivalin evropian të këngës.

3.Krijuesve shqiptarë nuk u lejohet të marrin pjesë në festivalet analoge si Itali, Maqedoni, Bullgari, Greqi etj… sepse nuk kanë nënshtetësinë e vendit përkatës.

4.Në një kohë kur elementi që i jep këngës fizionominë e muzikës tradicionale shqiptare është kompozitori, ky element hiqet nga individë të cilët nuk kanë asnjë kontribut në muzikën shqiptare, pa marrë asnjë mendim nga artistët që kanë mbajtur gjallë vazhdimësinë e këtij festivali.

5.Në një kohë që me dhjetëra kompozitorë të suksesshëm shqiptarë nuk janë ftuar në festival në kundërshtim me gjithë vitet e kaluara, porositen kompozitorë shqiptarë e të huaj me nga dy këngë.

6.Në kundërshtim të hapur me ligjin e të drejtës së autorit është hequr titulli orkestrues muzikor i këngës, si autor me të drejta të njohura ligjërisht.

7.Festivali i këngës në R.T.SH. gëzon një popullaritet të madh në mbarë opinionin publik shqiptar, duke patur një ndjeshmëri shumë të lartë edhe për faktin që financohet direkt nga taksapaguesit shqiptarë, të cilët duan të investojnë në kulturën shqiptare që ka aq shumë nevojë, pasi është në gjendje të mjeruar ekonomike edhe për faktin që R.T.SH. nuk paguan asgjë për detyrimin që ka në zbatim të ligjit të së drejtës së autorit.

Në lidhje me shqetësimet e parashtruara, jemi të detyruar të gjithë së bashku, si krijues dhe autorë, të ngremë zërin kundër këtyre fakteve abuzive, duke kërkuar unanimisht marrjen e masave për ndryshimin e kësaj situate shqetësuese dhe të një kontrolli financiar të festivalit të 58 të këngës në R.T.SH.

Asambleja ALBAUTOR