Fetnete Ramosaj, denoncuesja e gjenocidit në Kosovë

Fetnete Ramosaj ka qenë denoncuesja më e madhe e krimit të bërë në Kosovë. Ajo ka qenë zëri i UÇK-së. Kështu u tha në mbledhjen përkujtimore për ish-luftëtaren e UÇK-së, Fetnete Ramosaj, organizuar nga komuna e Deçanit dhe OVL e UÇK.

Me këtë rast, Kryetari i komunës së Deçanit, Bashkim Ramosaj tha se zëri i saj ka qenë simbol i lirisë.

“Fetnete Ramosaj është ikona e luftës në Dukagjin. Ka pasur një jetë në shërbim të vendit, një arkivë. Fetnetja ka qenë pjesëmarrëse e luftës çlirimtare. Gjatë luftës në Kosovë, ka kryer detyrën e zëvendëses së UÇK-së në Dukagjin, ka raportuar për Agjencinë e Lajmeve KosovaPress. Ishte dhe mbeti zëri i ndërgjegjes sonë gjatë luftës dhe pas saj. Ajo ka qenë dhe mbetet denoncuesja më e madhe e gjenocidit që u bë në Kosovë. Kishe fjalë pak por ka bërë shumë”, tha Bashkim Ramosaj duke kujtuar fjalët e Fetnetes gjatë kohës sa ishte e sëmurë.

“Unë i kom marrë lakmi vdekjes së vëllazërive Bytyqi se ka pasur shtet si Amerika, që i ka mbrojtur, por pas sëmundjes sime, kryeministri më ka përkrahur gjithmonë.”

Në emër të bashkëluftëtarëve, Sali Lajçi tha se Fetnetja ka qenë ndër personalitetet më të njohura në luftë.

“Nga gjitha personalitet që kam njohur në luftë, ajo ka qenë më e kompletuara. Nga kjo foltore ajo skaliti dhe i dha epitet fitoret e betejave në Zonën Operative të Dukagjinit. Shpesh herë u gjetën krah për krahë edhe me Ramush Haradinajn. Raportimet nga lufta i kishte të veçanta. Gjakun e dëshmorëve e ktheu në pendë. Do të kemi të vështirë të plotësojmë boshllëkun tënd”, ka thënë Lajçi.

Gjenerali i luftës, Kudusi Lame tha se ajo u treguar e zonja, trime dhe heroinë, duke tejkaluar kështu kufijtë gjinor.

“Fetnete Ramosaj ka ditur të përdor pendën, pushkën, duke mos u lëkundur. Ka jetuar shkurt, por veprat e saj kanë qenë të mëdha. Ajo u treguar e zonja dhe qëndrestare, trime dhe heroinë tejkaloi kufijtë gjinor. Duke treguar se femra mund të triumfojë. Roli dhe kontributi i saj, është shumë i rëndësishëm për të cilën ka se çka të shkruhet dhe flitet. Zgjodhi me vetëdije rrugën e vështirë dhe të lavdishme drejt lirisë. Ajo kishte edhe shumë punë për të bërë dhe shumë protesta për të organizuar.”