Fier, punimet e bllokuara në bypass , Serenissima duhet të paguajë 16 mln euro…

Braktisja e punimeve në Bypass-in e Fierit nga kompania italiane Serenissima, ka lënë pas një “mal” me konflikte gjyqësore me nënktraktorët për detyrime të papaguara.

Më herët këtë vit gjykata e ka dhënë të drejtë kompanisë CAE për të arkëtuar detyrime në vlerën e 16.2 milionë euro ndaj kompanisë italiane Serenissima.

Zyra përmbarimore EPSA tashmë ka marrë urdhërin e ekzekutimit ndaj të gjitha llogarive dhe aksioneve të kompanisë italine, e cila sipas vendimit të gjykatës nuk ka shlyer kontraktorin shqiptar për punimet e bëra.

Urdhri i ekzekutimit përfshin filialin e kompanisë në Shqipëri dhe Grupin e Serenisima në Itali.

Si lindi konflikti Serenissima- CAE

Kompania  italiane Serenissima Costruzioni S.p.A ka fituar tenderin ndërkombëtar për ndërtimin e By-Passit të Fierit duke nënshkruar kontratën me Autoritetin kompetent me 18 Mars 2013. Serenissima Costruzioni S.p.A. që kur fitoi tenderin në Shqipëri vendosi t’ia nënkontraktojë një pjesë të punimeve disa shoqërive, ndër te cilat CAE Sh.P.K.

Në një njoftim të posaçëm për median me 2016 Serenissima Costruzioni njoftoi prishjen e kontratës me nënkotraktorin shqiptare CAE, i cili edhe pse ka marrë pagesën 15.8 milionë euro nuk ka kryer punimet sipas parashikimeve në kontratë.

Nënkontraktohet deri me sot rezultojnë tetë. “Ne rastin e CAE sh.p.k që në bazë të detyrimeve kontraktuese duhet të kishte kryer punimet me mjetet dhe punëtorët e saj, përvoja ka provuar të kundërtën dhe Serenissima Costruzioni është detyruar, edhe pse pa dëshirën e saj, te zgjidhe Kontratën e Nënkontraktimit me këtë të fundit për arsye të mos përmbushjeve të mëdha të detyrimeve kontraktuese, ndër të cilat, vonesat e rëndësishme të kësaj në dorëzimin e veprës, përkundër kërkesave të vazhdueshme” sqaroi Serenissima Costruzioni në një njoftim të posaçëm në mes të vitit 2016.

Por  CAE ka pretenduar se Serenisma nuk e ka shlyer për punimet e bëra, teksa cështja ka përfunduar në gjykatë, ku vendimi shihet të ketë qenë në favor të nënkontraktorit.

Kompania CAE e regjistruar në Qendrën Kombëtare të Regjistrimit në vitin 2007 me aktivitet kryesor sektorin e ndërtimit.

 Bypass-i i Fierit, nyja strategjike për dy autostradat

Bypass-i  Fierit është një autostrade interurbane midis qytetit të Fierit dhe Levanit me gjatësi afërsisht 22 km. Sipas të dhënave të Autoritetit Rrugor Shqiptar, Bypass-i është pjesë e një korridori të rëndësishëm  aksin Veri – Jug ( nga Lushnja na Vlore), për të cilin disa sektorë janë ndërtuar ose janë në ndërtim e sipër. Sipas afateve rruga duhet të kishte përfunduar në shtator 2015.

Aksi rrugor kalon në perëndim të Fierit, midis qytetit dhe vijës se bregut, duke përfshirë në pjesën më të madhe një fushe që kultivohet e vaditet në mënyre intensive. Ai përshkon Lumin e Semanit, një rrjedhje e rëndësishme uji, i cili bashkohet me lumin Gjanica dhe një numër të madh kanalesh vaditjeje dhe kullimi sikurse edhe me shumë struktura të vogla hidraulike dhe kullimi.

Aksi rrugor është shumë i rëndësishëm për zhvillimin e Shqipërisë jugore, për zhvillimin industrial dhe të turizmit, dhe ka një impakt të rëndësishëm në bujqësi, meqenëse Fieri është rajoni me  rëndësishëm i prodhimit bujqësor në vend. Lartësia e rrugës është pozicionuar përgjithësisht nga 2 – 5 m nga sipërfaqja e tokës dhe 8 m nga ky nivel në rastin e kryqëzimeve në disnivel.

Janë parashikuar gjithashtu shumë nënkalime për sigurimin e vazhdueshmërisë e trafikut lokal.

Fondi limit për ndërtimin e këtij aksi rrugor ka qenë 60 milion euro ndërsa vlera e prokuruar e objektit është 39.87 milion euro. Punimet civile do të financohen nga BERZH dhe BEI ndërsa supervizioni i punimeve do të financohet nga Kooperacioni italian.

Financimi i BERZH 35 mln euro dhe BEI  me 35 mln euro. Sipas të dhënave të ARRSH, kompania e shpallur fituese nga procesi i prokurimit, me ofertën më të ulet ishte Serenissima S.p.A, një nga kompanitë me të mëdha ne tregun italian. Vlera e ofruar prej saj për ndërtimin e Bypass-it te Fierit është 39.87 milion euro me një kursim prej rreth 20 milion euro. Por pas ikjes së kompanisë italiane qeveria ka ritenderuar punimet në këtë objekt./Monitor/