Fillojnë punimet në Lotin 3, ARRSH: Ja si ndryshon lëvizja e mjeteve në Unazën e Madhe

Sot filluan punimet për ndërtimin e Lotit 3 ndërkohë Autoriteti Rrugor Shqitar, ARRSH, njofton se ndryshon dhe drejtimi i lëvizjes për mjetet në Unazën e Madhe.

“Automjetet që do të vijnë nga Sheshi Shqiponja në drejtim të Pallatit me Shigjeta, pas daljes nga nënkalimi i “Ozone”, njofton ARRSH, do të devijojnë majtas duke përdorur karrexhatën e re të rrugës kryesore të Lot-it 3, duke shmangur kështu aksin kryesor deri pranë Mbikalimit te Pallatit me Shigjeta, e duke vazhduar më pas sipas orientimit ekzistues. 

Automjetet që përdorin aksin e rrugës dytësore djathtas, nuk do të kenë ndryshim të lëvizjes.

Automjetet që do të vijnë nga Mbikalimi i Pallatit me Shigjeta në drejtim të rruges “Teodor Keko”, do të devijojnë djathtas duke përdorur karrexhatën e re të rrugës dytësore të Lotit 3, duke shmangur kështu aksin kryesor deri pranë nënkalimit të O-Zone, e duke vazhduar më pas sipas orientimit ekzistues në Lotin 2. 

Për automjetet që do të kenë destinacion Yzberishtin, Bulevardin “Migjeni”, “Kombinatin” nuk do të ketë ndryshime në qarkullim.

Autoriteti Rrugor Shqiptar, përmes njoftimit, kërkon mirëkuptimin e banorëve dhe përdoruesve të rrugës për këto ndërhyrje që po kryhen në këtë aks deri në përfundimin e plotë të këtij projekti.

Ndërkohë ARRSH bënë të ditur se kanë filluar punimet tek rrethrrotullimi i TEG-ut dhe punimet do të kryhen vetëm gjatë natës duke devijuar trafikun.