Fillon projekti i HEC-it Skavicës, Ambasadorja e SHBA: Ditë historike…

Sot është një ditë historike në këtë marrëdhënie me fillimin e projektit për hidrocentralin e Skavicës, midis Qeverisë së Shqipërisë dhe një prej kompanive më të mëdha amerikane të infrastrukturës, Bechtel, tha Ambasadorja e Shteteve të Bashkuara, Yuri Kim, në nisjen e projektit për HEC-in e Skavicës me të cilin Shqipëria do të jetë një hap më pranë shndërrimit në një eksportues të qëndrueshëm të energjisë

“Skavica ka qenë një ëndërr në vend, për dekada të tëra, dhe sot është një nga gurët më të rëndësishëm kilometrikë që më në fund po e shohim të bëhet realitet. Ky projekt do të ndihmojë që Shqipëria të jetë një hap më pranë shndërrimit në një eksportues të qëndrueshëm të energjisë, më shumë se sa importon, dhe që mund të ndihmojë për të zgjidhur ndryshimet klimatike dhe shqetësimet e shëndetit publik, jo vetëm brenda Shqipërisë, por edhe brenda një rajoni që është tepër i varur nga fabrikat ndotëse të qymyrit,” tha Ambasadorja e SHBA, Yuri Kim, duke shtuar se mirëpret më shumë projekte mes Shqipërisë dhe Shteteve të Bashkuara.

Ndërsa Ministrja e Infrastrukturës dhe Energjisë, Belinda Balluku, aty ku nisi puna për pjesën e katërt të kaskadës së Drinit, tha se HEC-i i Skavicës kontribuon në transformimin e Shqipërisë në vend eksportues të energjisë.

“HEC Skavica, pjesa e katërt dhe e munguar e kaskadës së Drinit prej 50 vjetësh, e cila rrit sigurinë energjetike, rrit kapacitetet prodhuese dhe mbrojtjen nga përmbytjet, kontribuon ndjeshëm drejt transformimit të Shqipërisë në vend eksportues neto të energjisë elektrike,” tha ministrja Balluku.

Ndryshe, më 3 tetor 2020, Nënsekretari i atëhershëm për Rritjen Ekonomike, Energjinë dhe Mjedisin Keith Krach vizitoi Shqipërinë dhe nënshkroi një Memorandum të Bashkëpunimit Ekonomik midis Shteteve të Bashkuara dhe Shqipërisë. Njës vit më pas, fillon projekti për hidrocentralin e Skavicës, midis Qeverisë së Shqipërisë dhe kompanisë amerikane, Bechtel.