Fillon shtypja e fletëvotimeve për zgjedhjet e 9 shkurtit në Kosovë

Ka filluar shtypja e fletëvotimeve për zgjedhjet për Parlamentin e Kosovës, të cilat do të mbahen më 9 shkurt 2025.

Lajmin e ka bërë të ditur Komisioni Qendror i Zgjedhjeve duke saktësuar se shtypja e fletëvotimeve po realizohet në shtypshkronjën e dokumenteve me siguri të lartë, “Cetis”, në Celje të Sllovenisë.

Ky proces po zhvillohet sipas standardeve ndërkombëtare dhe nën mbikëqyrjen e një delegacioni të KQZ-së të udhëhequr nga kryesuesi, Kreshnik Radoniqi dhe stafi i Sekretariatit të KQZ-së.

KQZ njofton se përveç fletëvotimeve, janë duke u shtypur edhe broshurat me listat e kandidatëve, të cilat do të jenë të disponueshme për votuesit në vendvotime gjatë ditës së zgjedhjeve.

“Në mbledhjen e mbajtur më 15 janar, KQZ mori vendim për numrin e fletëvotimeve dhe broshurave që do të shtypen. Sipas vendimit të KQZ-së do të shtypen 1.752.650 fletëvotime, prej të cilave 1.664.100 për votimin në vendvotime të rregullta; 28.450 për votimin me kusht; 38.650 për votimin e personave me nevoja të veçanta dhe si fletëvotime rezervë; dhe 21.450 për votimin në përfaqësi diplomatike”, thuhet në njoftim.

Bazuar në Listën e Votuese të certifikuar nga Komisioni Qendror i Zgjedhjeve, numri i shtetasve të Kosovës me të drejtë vote është 2.075.868 votues, prej të cilëve 1.970.944 janë votues që i takojnë Listës Votuese brenda Kosovës dhe 104.924 votues janë pjesë e Listës Votuese jashtë Kosovës.

Kështu, sipas vendimit të KQZ-së, do të shtypen 323.218 apo 15.57 për qind fletëvotime më pak se numri i votuesve. Kjo është një praktikë e ndjekur nga KQZ edhe në proceset e kaluara zgjedhore.