Fillon viti i ri shkollor me mësues të vaksinuar e nxënës me maska. Urime…

Sot filloi viti i ri shkollor për arsimin parauniversitar në Shqipëri ku të gjithë nxënësit e mësuesit mund të zhvillojnë mësim fizikisht, por me masa.

Mësuesit janë të detyruar që të kenë certifikatë vaksinimi ose test të përjavshëm ndaj COVID-19, në klasa është detyueshme maska, distanca si dhe mësimi zhvillohet me orë fikse të shkurtuara nga 30 minuta.

Deri në klasën e pestë mësimi do të zhvillohet me dy turne në orare të ndryshme.

Me fillimin e vitit të ri shkollor, urimet për të gjithë nxënësit dhe mësuesit kanë ardhur nga Presidenti Ilir Meta dhe Kryeministri Edi Rama.

“Një vit të mbarë dhe me plot arritje të shkëlqyera në rrugën e dijes, veçanërisht për vogëlushët, të cilët ulen sot për herë të parë në bankat e shkollës! Urime të ngrohta dhe shumë suksese për të gjithë mësuesit dhe profesorët në misionin e tyre fisnik,” thekson Presidenti Meta në urimin e tij përmes rrjetit social Facebook shoqëruar dhe me një foto ng abankat e shkollës.

Ndërkohë Kryeministri Edi Rama e nis mëngjesin me urimin për nxënësit dhe mësuesit:

“Mirëmëngjes dhe me zilën e parë që bie për disa nga shkollat e reja të rindërtuara pas tërmetit, uroj përzemërsisht çdo nxënës që nis sot vitin e ri shkollor, shumë suksese e mbarësi në këtë rrugëtim të bukur dijeje për të ardhmen,” thekson Kryeministri Edi Rama përmes rrjetit social Facebook duke e shoqëruar dhe me një video.

Ndryshe, në prag të fillimit të vitit të ri shkollor, ministrja e Arsimit dhe Sportit, Evis Kushi, duke iu drejtuar me një urim të gjithë nxënësve dhe mësuesve u kërkoi të zbatojnë masat Anticovid.

“Siguria dhe shëndeti juaj është elementi më i rëndësishëm për të gjithë ne, prandaj lutja ime për ju është që t’i respektoni të gjitha masat në shkollë,” u shpreh ministrja e Arsimit, Evis Kushi, duke shtuar se kënaqësia më e madhe është që ju të nisni vitin e ri shkollor dhe t’i mbushni klasat tuaja me gjallëri dhe dashuri.