Financat: Detyrimet që janë paguar për Arbitrazhet

Lidhur me vlerën totale të detyrimit, vlen të sqarohet se, ndërsa shpenzimet për pagesën e avokatëve/studiove ligjore janë kosto të drejtpërdrejta në buxhet dhe të parashikuara, vendimet e arbitrazheve, nëse nuk kanë marrë formë të prerë, konsiderohen si detyrime kontingjente për buxhetin.

Ministria e Financave dhe Ekonomisë njoftoi se një arbitrazh i Ministrisë së Bujqësisë me “Valeria Italia S.R.L.” është tërhequr dhe tashmë po përpiqet që të zgjidhet me mirëkuptim, ndërkohë që detyrimi ndaj “Hydro S.R.L.” konsiderohet si kontingjent. Në një përgjigje zyrtare për “Monitor” lidhur me pagesat që ka bërë shteti për arbitrazhet, ministria dha edhe disa detaje.

“Vendimet e Gjykatës Ndërkombëtare të Arbitrazhit kanë të bëjnë me vendimet e formës së prerë për zgjidhjen e konflikteve në mosmarrëveshjet dy ose shumëpalëshe, në ngarkim të shtetit shqiptar. Duke pasur parasysh efektet e qenësishme financiare që shoqërojnë këto vendime, Ministria e Financave dhe Ekonomisë, në vazhdimësi dhe me këmbëngulje, ka rekomanduar forcimin e rolit negociues të institucioneve buxhetore dhe Avokaturës së Shtetit në çështjet e kësaj natyre, si dhe disiplinimin e procesit të shlyerjes financiare të përfituesve. Kjo, me qëllimin final të lehtësimit, reduktimit dhe/ose shmangies së barrës financiare mbi buxhetin e shtetit.

Ministria e Financave dhe Ekonomisë kërkon, në mënyrë periodike, nga Ministritë e Linjës informacion mbi detyrimet dhe pagesat që lidhen me vendimet e Arbitrazhit. Ministritë e Linjës raportojnë informacionin që iu përcjell Avokatura e Shtetit, kryesisht referuar faturave përkatëse për likuidim (detyrime të studiove ligjore, detyrime ekspertësh apo shpenzime avokatësh).

Lidhur me vlerën totale të detyrimit, vlen të sqarohet se, ndërsa shpenzimet për pagesën e avokatëve/studiove ligjore janë kosto të drejtpërdrejta në buxhet dhe të parashikuara, vendimet e arbitrazheve, nëse nuk kanë marrë formë të prerë, konsiderohen si detyrime kontingjente për buxhetin.

Për këtë sqarojmë se:

–           Detyrimi prej 108 milionë eurosh, për çështjen e Arbitrazhit ICSID nr.ARB/15/28 “Hydro dhe të tjerët kundër Shqipërisë”, është detyrim kontingjent. Kjo pasi, nga Avokatura e Shtetit jemi njoftuar mbi nisjen e procesit të anulimit të këtij vendimi. Në kuadër të këtij procesi anulimi, nga Avokatura e Shtetit janë dërguar faturat përkatëse për likuidim. Konkretisht, në periudhën nëntor-dhjetor 2020, nga MFE është likuiduar fatura për angazhimin e ekspertit në masën 20,000 euro dhe fatura mbi kostot e tjera administrative në procesin e anulimit të këtij vendimi në masën 200,000 $.

–           Detyrimi i Ministrisë së Bujqësisë dhe Zhvillimit Rural prej 550,000 eurosh, për çështjen e Arbitrazhit “Valeria Italia S.R.L”, është detyrim kontingjent. Kjo pasi, ndërmjet palëve të përfshira në procesin e arbitrazhit ka filluar bashkëpunimi për zgjidhjen me mirëkuptim të mosmarrëveshjes. Në kuadër të këtij procesi bashkëpunimi, MBZHR ka likuiduar faturën prej 69,000 eurosh për kostot administrative gjyqësore.

Në përfundim sqarojmë se Ministria e Financave dhe Ekonomisë monitoron dhe raporton, në mënyrë të rregullt periodike, informacionin mbi detyrimet e vendimeve të arbitrazhit. Ky monitorim është tërësisht i vazhdueshëm dhe transparent.

Informacioni i plotë mbi ekzekutimin dhe detyrimet që rrjedhin nga këto vendime publikohet në ‘Raportin e mesvitit mbi zbatimin e buxhetit’ dhe ‘Raportin mbi zbatimin e buxhetit vjetor, situatën makroekonomike dhe fiskale’, në faqen zyrtare të MFE-së” thuhet në përgjigjen e MFE./Monitor/