Financial Times: Assadi transportoi me avion në Rusi dy ton para
Diktatori sirian i saporrëzuar Basha al Assad ka transportuar me avionë 250 milionë dollarë në Moskë nga viti 2018 dhe 2019
Duke cituar të dhënat financiare që thotë se i ka pa, Financial Times raporton se Banka Qendrore e Sirisë ka transportuar me avion rreth dy ton kartmonedha me prerje prej 100 dollarëve dhe 500 eurove në Rusi, që më pas janë deponuar në bankat e sanksionuara.
Mediat theksojnë se këto para janë transportuar në kohën kur regjimi i Assadit varej shumë nga mbështetja ushtarake ruse, e kusherinjtë e Assadit në të njejtën kohë kanë blerë prona në Rusi, duke përfshirë banesa luksoze.
Moska ka dislokuar forcat e saj në Siri në vitin 2015 duke e mbështetur regjimin e Assadit kundër forcave kryengritëse. Rebelët sirianë kanë bërë të ditur më 8 dhjetor se kanë rrëzuar me sukses Assadin pas ofansivës së furishme në mbarë vendin, që kulmoi me marrjen e kryeqytetit Damask.
Assad iku në Rusi
Moska e ka bindë Assadin që të largohet në Rusi me familjen e tij pasi e kuptoi se regjimi i tij do të bie për shkak të përparimit të rebelëve, raporton Bloomberg më 11 dhjetor, duke ju referuar burimeve të afërta me Kremlinin.
Një ekspert tha për Financial Times se transporti i parave nga Damasku në Moskë ishte dëshmi e kombinimit të sigurimit të pasurisë së fituar në mënyrë të paligjshme dhe pasurisë shtetërore siriane jashtë shtetit.
“Regjimi duhet ta transportonte paranë jashtë shtetit, në një vend të sigurt, në mënyrë që të ketë mundësi ta përdor për garantimin e një jete të këndshme për Assadin dhe rrethin e tij të ngushtë,” tha Nd/Sekretari amerikan i Shtetit për çështjet e Lindjes Mesme nga viti 2019-2021, David Schenker.
