Financieri i kokainës së Xibrakës, lirohet nga burgu nipi i Enver Hoxhës

Lirohet nga burgu nipi i Enver Hoxhës. 43-vjeçari Ermal Hoxha u arrestua në vitin 2014 në operacionin e famshëm të zbulimit të laboratorit të kokainës në Xibrakë të Elbasanit.

Ermal Hoxha u dënua nga Gjykata e Krimeve të Renda me 10 vite burg, si financieri i kokainës së Xibrakës. Por në Gjykatën e Apelit ai përfitoi një ulje dënimi në vetëm 6 vjet e 8 muaj heqje lirie. Nipi i ish-diktatorit Enver Hoxha vuajti vetëm 4 vjet burg dhe pjesën tjetër e ka konvertuar për shkak të qëndrimit në paraburgim.

Ai u dënua për trafik ndërkombëtar narkotikësh. Gjykata e Apelit pranoi edhe kërkesën për gjykim të shkurtuar duke ulur 1/3 e dënimit për të ndaluarit. Nga anëtarët e tjerë të grupit, Ilir Hyseni ishte dënuar me 12 vite, por iu ul në 8 vite dënimi. Cesar Avila e Valther Moreno ishin dënuar me nga 12 vite, u bëhet 8 vjet burg. Genci Xhixha është dënuar 8 vjet e 7 muaj, në mungesë. Arjan Dalipi 6.7 vite burg, Gentian Gjonaj 7.3 vite burg, Kelemnd Dalipi 7.3 vite burg dhe Sajmir Batku 8.7 vite burg.