Finlanda po heton ndërhyrjen e Rusisë në sistemin GPS

Finlanda është duke hetuar nëse Rusia ka ndërhyrë së fundmi në sinjalet e Sistemit Global të Pozicionimit, GPS në veri të rajonit verior të këtij shteti, Lapland, gjatë stërvitjeve të NATO-s, duke rrezikuar trafikun ajror civil, raporton RFE.

Kryeministri finlandez, Juha Sipila, i ka bërë këto deklarata pasi shëbimet ajrore të Finlandës kanë nisur një paralajmërim për shkak të pengesave në sistemin e GPS-it në veri të këtij shteti.

Edhe Norvegjia ka bërë një paralajmërim të ngjashëm në fund të muajit tetor, kur kishin filluar stërvitjet më të mëdha ushtarake në NATO-s që prej kohës së Luftës së Ftohtë.

“Ka mundësi që Rusia qëndron mbrapa ndërhyrjes”, ka thënë Sipila në një intervistë për Radion Suomi.

“Jemi duke hetuar dhe do të përgjigjemi në mënyrë adekuate. Kjo nuk është çështje e vogël pasi fluturimet e civilëve janë rrezikuar”, duke shtuar se incidenti është duke u trajtuar si “shkelje e hapësirës ajrore”.

Në stërvitjet më të mëdha të NATO-s që nga periudha e Luftës së Ftohtë, janë përfshirë 29 anëtarë të aleancës Perëndimore, si dhe partnerët, Finalanda dhe Suedia.

Stërvitjet dyjavore janë mbajtur afër Rusisë në kohën kur Perëndimi dhe Moska vazhdojnë të rrisin tensionet.

Stërvitjet janë kritikuar nga Moska, e cila ka aneksuar Krimenë nga Ukraina në vitin 2014 dhe mbështet separatistët në konfliktin në lindje të Ukrainës, mirëpo akuzon NATO-n për qasje provokative afër kufijve të saj.

Finlanda, që ndan 1,340 kilometra të kufirit me Rusinë ka ndërtuar lidhje të ngushta me NATO-n mirëpo nuk është plotësisht e anëtarësuar në Aleancë.

Kremlini mohon se ka penguar sinjalin GPS

Kremlini i hodhi poshtë akuzat e kryeministrit të Finlandës, Juha Sipila, se Rusia mund ta ketë penguar me dashje sinjalin GPS të Finlandës, gjatë stërvitjeve të NATO-s që janë duke u zhvilluar në vendet nordike.

Ai tha se beson se sinjali është penguar qëllimisht dhe se Rusia mund të fajësohet, pasi ajo, sipas tij, i ka mjetet për ta bërë një gjë të tillë.

Zëdhënësi i Kremlinit, Dmitry Peskov, tha se nuk ka informacione se Rusia mund të jetë përgjegjëse.

Peskov tha se “vendi i tij akuzohet rregullisht për të gjitha llojet e krimeve”, porse “shumica e tyre janë të pabaza”.

GPS është një sistem global i navigimit, i krijuar fillimisht nga ushtria amerikane, që funksionon duke dërguar sinjale nga satelitët mbi Tokë te marrësit në Tokë.

Marrëdhëniet midis NATO-s dhe Rusisë janë tensionuar qëkur Rusia ka aneksuar Krimenë nga Ukraina në vitin 2014.

Finlanda nuk është anëtare e NATO-s, por u është bashkuar lojërave të luftës që kanë filluar muajin e kaluar.

Norvegjia gjithashtu ka raportuar probleme me GPS gjatë ushtrimeve pranë kufirit veriperëndimor me Rusinë