Firmoset Vendimi për liberalizimin e vizave për Kosovën

Presidentja e Parlamentit Evropian, Roberta Metsola, dhe ministrja për Evropën e Suedisë, Jessika Roswall, si përfaqësuese e Këshillit Evropian, shteti i së cilës është kryesuese e radhës, firmosën sot në Strasburg Aktin ligjor të Bashkimit Evropian për liberalizimin e vizave për Kosovën.

“Moment krenarie për Parlamentin Evropian, pasi sot e dhamë dritën jeshile përfundimtare për liberalizimin e vizave për Kosovën. Kjo do t’ua lehtësojë jetën qytetarëve të Kosovës – për të udhëtuar, për të bërë biznes si dhe për t’i forcuar lidhjet me bashkëqytetarët evropian,” u shpreh Presidentja e Parlamentit Evropian përmes rrjetit socia Twitter, Roberta Metsola, pas ceremonisë së firmosjes.

Signed, sealed, delivered.

Proud moment for @Europarl_EN as today we gave our final green light for visa liberalisation with Kosovo.

This will make life easier for the people of Kosovo – to travel, to do business, to deepen the bond with fellow Europeans. pic.twitter.com/cZVx5eZ8QU

— Roberta Metsola (@EP_President) April 19, 2023

Raportuesi i Parlamentit Evropian për vizat për Kosovën, Thijs Reuten, i cili mori pjesën në ceremoninë e firmosjes së këtij Akti ligjor së bashku me Zv/kryeministrin e Kosovës, Besnik Bislimi, dhe ministren e Jashtme të Kosovës, Donika Gërvalla-Schwarz, tha se ky nuk është moment i rëndësisë së madhe vetë për Kosovën por edhe për BE.

“Ky vendim nuk është kuptimplotë vetëm për Kosovën, për shkak se të gjithë shtetasit e tjerë të rajonit kanë mundur të udhëtojnë, përveç Kosovës. Ishte i padrejtë, i paarsyeshëm dhe kësaj situate tashmë i ka ardhur fundi. Kosova ka punuar shumë për të plotësuar të gjitha kushtet dhe për t’i përmbushur ato para shumë vjetësh dhe tashmë po shpërblehet për këtë gjë. Por, nuk është vetëm moment i rëndësisë së madhe për Kosovën, por është me rëndësi edhe për ne, pasi BE-ja përfundimisht e përmbushi premtimin e vetë,” tha Reuten duke shtuar se ky Vendim hap kapitull të ri për integrimin e rajonit në BE.

“Nuk mund t’ia falim vetes që të na ikë kjo mundësi për një kohë të gjatë. Duhet të punojmë që këtë rajon ta fusim në familjen tonë evropiane!”

Ndërkohë Zv/Kryeministri i Kosovës, Besnik Bislimi, tha se nga janari nuk do të ketë mijëra mundësi të humbura për shtetasit e Kosovës.

“Ky ka qenë një proces i gjatë, i vështirë, me shumë pengesa rrugës dhe ka marrë 11 vjet kohë për ta përmbyllur. Liberalizimi i vizave do të mundësojë kontakte midis njerëzve, të përforcojë lidhjet tona me BE-në, të konfirmojë përkushtimin e BE-së për rajonin dhe të rrisë aktivitetet biznesore, arsimore dhe kulturore për qytetarët tanë.”

Ndryshe, me botimin e këtij Vendimi në Gazetën Zyrtare të BE-së dhe hyrjen në fuqi, qytetarët e Kosovës do të mund të lëvizin pa viza në vendet e Zonës Shengen prej 1 janarit të vitit 2024.

Dje Parlamenti Evropian e miratoi vendimin për vizat, duke përmbyllur procedurat vendimmarrëse për këtë çështje. Miratimi u bë pa votim, pasi nuk kishte asnjë kundërshtim.

Regjimi pa viza mundëson deri në 90 ditë, brenda gjashtë muajsh, në cilindo nga shtetet anëtare të Zonës Schengen dhe shërben për vizita turistike, çështje familjare ose të ngjashme, dhe nuk nënkupton leje pune ose përfitime të tjera.