Fitër Bajrami, Kryetari KMSH: E lusim Zotin, Shqipëria të bëhet një vend më shpresëdhënës për shqiptarët!
Kush agjëron Ramazanin me besim dhe duke qenë i bindur në shpërblimin e Zotit, atij i falen të gjitha gjynahet e kaluara! Kështu shprehet Kryetari i Komunitetit Mysliman, Hoxhë Bujar Spahiu, duke cituar Profestin Muhamet (a.s.) në mesazhin për Fitër Bajramin, festës së përmbylljes me sukses të sakrificës shpirtërore dhe fizike të këtij muaji të begatë që i erdhi fundi
“Nesër kemi festë, kemi Fitër Bajram! Fitër Bajrami është festa e përmbylljes me sukses, me lejen e Zotit, të një rrugëtimi të përsosjes shpirtërore. Bajrami është lumturia që ne ndiejmë me plotësimin e agjërimit të Ramazanit si dhe falenderimi ndaj Zotit për mirësitë që na ka begatuar,” shprehet Hoxhë Bujar Spahiu në urimin e tij me shpresën e fitimit të kënaqësisë së Zotit dhe pranimit të agjërimit, lutjeve dhe të gjitha adhurimeve gjatë këtij muaji të bekuar, që po e përcjellim sot ndërsa përfundoi:
“E lusim Zotin që vendi ynë, Shqipëria, të bëhet një vend më i mirë, më i begatë e më shpresëdhënës për shqiptarët. Motra dhe vëllezër, ngrohtësia e Bajramit le të sjellë lumturi dhe të mbushë jetën tuaj me gëzim dhe hare. Zoti i Madhëruar ju bekoftë sot, nesër dhe gjithmonë. Paçi një Bajram të begatë! Gëzuar!”
Ndërkohë Komuniteti Mysliman i Shqipërisë njofton të gjithë besimtarët se namazi i Fitër Bajramit do të falet në Sheshin “Skënderbej”, më datë 10 Prill 2024, ora 06:55.
Programi i plotë i Fitër Bajramit:
06:30 – Lexim Kur’ani nga imami i xhamisë “Et’hem Bej”, z. Elton Karaj
06:35 – Fjala përshëndetëse e Kryetarit të KMSH-së, H. Bujar Spahiu
06:45 – Ligjëratë nga Nënkryetari i KMSH-së, z. Lauren Luli
06:55 – Falja e namazit të Bajramit, prin faljen kryetari i KMSH-së, H. Bujar Spahiu
07:00 – Hutbeja e Bajramit nga Myftiu i Tiranës, z. Gazment Teqja
Urimi:
Të dashur motra dhe vëllezër!
Ashtu si çdo gjë që ka një fillim dhe një fund, përveç Zotit, i Cili është i pafillim e i pafund, sakrificës tonë shpirtërore dhe fizike të këtij muaji të begatë i erdhi fundi.
Për një muaj kemi agjëruar me besimin dhe shpresën e fitimit të kënaqësisë së Zotit.
Zoti i gjithësisë qoftë i kënaqur me ne dhe na e pastë pranuar agjërimin, lutjet dhe të gjitha adhurimet gjatë këtij muaji të bekuar, të cilin po e përcjellim sot.
Nesër kemi festë, kemi Fitër Bajram!
Fitër Bajrami është festa e përmbylljes me sukses, me lejen e Zotit, të një rrugëtimi të përsosjes shpirtërore.
Bajrami është lumturia që ne ndiejmë me plotësimin e agjërimit të Ramazanit si dhe falenderimi ndaj Zotit për mirësitë që na ka begatuar.
Profeti Muhamed (a.s.) ka thënë: “Kush agjëron Ramazanin me besim dhe duke qenë i bindur në shpërblimin e Zotit, atij i falen të gjitha gjynahet e kaluara.”
E lusim Zotin të na ketë falur të gjitha mëkatet, ashtu siç Ai na ka premtuar.
E lusim Zotin për të sëmurët, që t’u jap shëndet.
E lusim Zotin për rininë tonë, që ta udhëzojë atë.
E lusim Zotin për prindërit, të moshuarit e çdo njeri në nevojë, që t’ia largojë brengat dhe vuajtjet.
E lusim Zotin që vendi ynë, Shqipëria, të bëhet një vend më i mirë, më i begatë e më shpresëdhënës për shqiptarët.
E lusim Zotin që luftërat që po marrin jetë civilësh e fëmijësh në Gaza, Ukrainë e kudo, të marrin fund sa më parë.
Motra dhe vëllezër, ngrohtësia e Bajramit le të sjellë lumturi dhe të mbushë jetën tuaj me gëzim dhe hare.
Zoti i Madhëruar ju bekoftë sot, nesër dhe gjithmonë.
Paçi një Bajram të begatë!
Gëzuar!
