Fitër Bajrami/ Mesazhi, Kryetari i KMSH: I lutem Zotit të na ketë shtuar begatinë, paqen dhe mëshirën e tij
Pas muajit të Ramazanit, muaj ku ndërlidhen përkushtimi e sakrifica, nesër, të gjithë besimtarët myslimanë festojnë Fitër Bajramin, festën që kurorëzon sakrificën e këtij muaji, dhe siç na ka premtuar Zoti (xh.sh.) në Kuranin Famëlartë, pas vështirësisë vjen lehtësimi, thekson Kryetari i Komunitetit Mysliman, Hoxhë Bujar Spahiu në mesazhin për Fitër Bajramin, duke uruar që se ata që kanë më shumë të japin për nevojtarët Zekatin, dhe të angazhohemi përditë për një shoqëri të drejtë e solidare ndërsa përfundon:
“I lutemi Zotit për kombin tonë, për rininë, për mësuesit, mjekët, policët, ushtarakët dhe gjithësecilin që punon për sigurinë, mirëqenien dhe prosperitetin e vendit tonë. Edhe njëherë ju uroj Gëzuar Fitër Bajramin me urimet më të përzemërta, në emrin tim personal dhe të Komunitetit Mysliman të Shqipërisë! Shëndet e mirësi për çdo familje shqiptare!”
Gëzuar!
Ndërkohë Komuniteti Mysliman i Shqipërisë njofton të gjithë besimtarët se Fitër Bajrami do të falet ditën e nesërme, e premte, 21 prill 2023, në orën 06:40 në Sheshin Skënderbej, Tiranë.
Programi i plotë i Fitër Bajramit:
06:10 – Hapja
06:15 – Lexim Kurani nga Imami i Xhamisë “Et’hem Bej”, z. Elton Karaj
06:20 – Fjala përshëndetëse e Kryetarit të KMSH-së, H. Bujar Spahiu
06:30 – Ligjëratë nga Nënkryetari i KMSH-së, z. Taulant Bica
06:40 – Falja e Namazit të Bajramit, prinë faljen Kryetari i KMSH-së, H. Bujar Spahiu
06:45 – Hutbeja e Bajramit nga Myftiu i Tiranës, z. Lauren Luli.
Këtë vit selia e KMSH-së do të jetë e hapur për publikun, cilindo besimtar, përfaqësues të besimeve, trupës diplomatike, politikës, shoqërisë civile e çdo qytetari tjetër që ka dëshirë të urojë Bajramin kryetarit Spahiu, është i mirëseardhur për të përcjellë urimet.
Orari i pritjeve
09:00 – 12:00
Mesazhi:
Të dashur besimtarë myslimanë dhe shqiptarë kudo që ndodheni, më lejoni t’ju uroj nga zemra gëzuar Fitër Bajramin.
Pas muajit të Ramazanit, muaj ku ndërlidhen përkushtimi e sakrifica, muaj në të cilin qenia jonë u shkëput nga përditshmëria materiale e muajve të tjerë, nesër, të gjithë besimtarët myslimanë festojnë Fitër Bajramin, festën që kurorëzon sakrificën e këtij muaji, dhe siç na ka premtuar Zoti (xh.sh.) në Kuranin Famëlartë, pas vështirësisë vjen lehtësimi.
Bajrami është festë që përjetohet në çdo zemër e në çdo vatër.
Urojmë që sikurse në këtë ditë kur ata që kanë më shumë japin për nevojtarët (ZEKATIN), t’i gjendemi përherë pranë të varfërve dhe të angazhohemi përditë për një shoqëri të drejtë e solidare.
Sakrifica dhe devotshmëria e muajit të Ramazanit duhet të jetë shembull i angazhimit tonë për adhurimin e Zotit të Gjithësisë, kurse solidariteti dhe dashuria që e karakterizojnë festën e Fitër Bajramit të jenë vlera të përhershme të shoqërisë dhe mbarë njerëzimit.
Motra dhe vëllezër, i lutem Zotit të na ketë pranuar këtë sakrificë, të na ketë falur gjynahet, të ketë shtuar begatinë, paqen dhe mëshirën e tij të pakufijshme mbi çdo zemër e cila ka sakrifikuar në emër të Zotit!
I lutem Zotit të mëshirojë të gjithë të dashurit tanë që nuk jetojnë më!
T’u japë shërim dhe t’u lehtësojë dhimbjen çdo të sëmuri!
Për më të varfërit dhe nevojtarët e shoqërisë tonë, o Zot largojua barrën e rëndë dhe shtrëngimin që sjell skamja.
I lutemi Zotit për kombin tonë, për rininë, për mësuesit, mjekët, policët, ushtarakët dhe gjithësecilin që punon për sigurinë, mirëqenien dhe prosperitetin e vendit tonë.
Edhe njëherë ju uroj Gëzuar Fitër Bajramin me urimet më të përzemërta, në emrin tim personal dhe të Komunitetit Mysliman të Shqipërisë!
Shëndet e mirësi për çdo familje shqiptare!
Gëzuar!
