Fitore në Tërnoc, Shaip Kamberi sërish deputet në Parlamentin e Serbisë

Sipas rezultateteve paraprake të zgjedhjeve të përsëritura dje në vendvotimin nr. 6 në Tërnoc të Madh të Bujanocit, Koalicioni i Shqiptarëve të Luginës, mori 686 vota, të mjaftueshme këto që kandidati i tij, Shaip Kamberi, të fitoi mandatin e deputetit në Parlamentin e Serbisë.

“Faleminderit pa fund, qytetarëve të Lagjës së Strukarëve të cilët përtej bindjeve politike sot votuan për përfaqësimin e shqiptarëve. Njëzëri. Faleminderit partnerëve të Koalicionit të Shqiptarëve të Luginës për angazhimin, përkushtimin dhe betejën që udhëhoqëm e fituam bashkë. Faleminderit edhe subjekteve tjera politike që veprojnë në Bujanoc e të cilat ndëgjuan drejtë nevojën e popullit shqiptar për vazhdimin e përfaqësimit parlamentar,” tha Shaip Kamberi në reagimin e tij përmes rrjetit social Facebook pas rikonfirmimit të mandatit të deputetit duke shtuar se 28 Prilli na bëri të gjithëve bashkë e bashkë ia dolëm të gjjthë ndërsa përfundoi:

“Unë do të vazhdojë të jem zëri i të gjithë qytetarëve pa dallim. Përtej çdo bindje politike janë shqiptarët. Faleminderit! Bashkë ia dolëm.”

Ndryshe, pas zgjedhjeve të përsëritura dje në vendvotimin nr. 6 në Tërnoc të Madh të Bujanocit ku 1.089 qytetarë ishin me të drejtë vote , Koalicioni i Shqiptarëve të Luginës i Shaip Kamberit mori 686 vota, SNS e Vuçiçit 1 votë, derisa 11 fletëvotime ishin të pavlefshme.