Fitorja e Donald Trump, rritje e dukshme në bursat evropiane

Pas lajmit mbi rikthimin e kandidatit republikan, Donald Trump, në Shtëpinë e Bardhë, në bursat evropiane u shënua një rritje e dukshme e aksioneve, ashtu si edhe atyre amerikane.

STOXX 600 indeksi kryesor i aksioneve evropiane në orën 9:30 ishte në plus 1.1 për qind.

Më pas indeksi londinez FTSE u forcua për 1.03 për qind, në 8.257 pikë, derisa ai i frankfurtit DAX u rrit 1.13 për qind, në 19.475 pikë, e ai parisien CAC 1.50 për qind, në 7.518 pikë.

Në Wall Street…

Wall Street siç duket reagoi shumë shpejt me fitoren e Donald Trump. Dow Jones, S&P 500 dhe Nasdaq tashmë janë rritur me 1 për qind, e indeksi terminal është në plus mbi 1 për qind, dhe sot pritet një rritje më e fortë në orët në vijim në bursën më të madhe botërore.

Kjo ka inkurajuar investitorët evropianë. Në shumicën e bursave aziatike çmimet e aksioneve kanë shënuar rënie. Indeksi aziatik MSCI në orën 9:30 ishte në minus 0.3 për qind. Ndërsa në bursën e Tokios indeksi Nikkei shënoi rritje mbi 2.5 për qind, ndërkohë çmimet e aksioneve në Australi janë rritur me 0.8 për qind. Nga ana tjetër, në Shangai, Korenë e Jugut Jdhe Hong Kong, është shënuar një rënie nga 0.1 deri në 2.3 për qind.

Mendohet se në bursat kineze është shënuar rënie e çmimit të aksioneve pasi fitorja e Donald Trump ka shkaktuar shqetësime, meqë Trumpi gjatë mandatit të kaluar vendosi taksa doganore për importin e prodhimeve kineze, si dhe gjatë fushatës së fundit zgjedhore paralajmëroi vendosjen e doganave për prodhimet kineze, mbi 60 për qind.

“Investitorët kinez kanë frikë nga rritja e mëtejme e tensioneve në marrëdhëniet tregtare dhe konkurrencës në sektorin teknologjik,” tha drejtori i kompanisë UOB Kay Hian, Steven Leung.