Fitorja e Durrësit, Berisha: 14 maji, fundi i Gjushit, Ardian Çelës dhe Edi Ramës!

Pritja madhështore që demokratët durrsakë i dhuruan sot Kryetarit të Partisë Demokratike, për Sali Berishën është një mesazh i shpresës së pashuar tek shqiptarët për ndryshimin historik të Durrësit, ndryshimin e Shqipërisë.

“Imagjinoni ju, ajo zonja që është, ajo del nga sirtarët e Gjushit. Ajo ka një dyshe që është një nga dyshet më mafioze, jo në Shqipëri, por në Ballkan edhe më gjerë. Gjushi dhe ai Çela, mikpritësit e Massimo Denaros. Nxënësit e tij në Shqipëri. Gjush, thuaju durrsakëve sa para nga taksat e tyre i ke dhënë McGonigalit? Do ta gjejmë dhe do të bëhesh përgjegjës për to,” tha Kryetari i Partisë Demokratike, Sali Berisha, para demokratëve të Durrësit ku dhe prezantoi kandidatin për kryetar të bashkisë, duke i bërë thirrje demokratëve durrsakë që deri në datën 14 maj të trokasin në çdo zemër, në çdo derë për të vendosur Igli Carën qytetar të parë të Bashkisë Durrës ndërsa përfundoi:

“E vërteta është që 14 maji, është fundi i Gjushit, fundi i Ardian Çelës, fundi i Edi Ramës. Fitorja e Durrësit, fitorja e durrsakëve, fitorja e Shqipërisë.”

Fjala e Kryetarit të PD, Sali Berisha, në prezantimin e kandidatit për Bashkinë Durrës, Igli Cara

Qytetare dhe qytetarë të Durrësit. Durrsake edhe durrsakë, një mirënjohje të pakufijshme ndaj jush për këtë manifestim madhështor tuajin. Manifestim të fitores. Mbështetjen e jashtëzakonshme për koalicionin ‘Bashkë Fitojmë’.

Një mirënjohje të pakufijshme durrsakëve edhe durrsakëve, kudo që janë sot në Durrës, në Shqipëri, në Europë, në botë për mbështetjen tejet të çmuar që i kanë dhënë dhe i japin PD, demokracisë shqiptare.

I dashur z.Ilir Meta, kryetar i PL. I dashur z.Oerd Bylykbashi, n/kryetar i PD, drejtues politik i zgjedhjeve në qarkun e Durrësit. E dashur znj.Fatbardha Kadiu, anëtare e kryesisë së PD. E dashur znj.Floriana Garo, anëtare e kryesisë së PD dhe zëdhënëse e kësaj partie. I dashur z.Igli Cara, kandidati ynë për qytetar të parë të Durrësit. I dashur z.Dritan Burgija, kryetar i PD. E dashur Jola, të falënderoj për paraqitjen e shkëlqyer që i ke bërë këtij takimi.

Miqtë e mi!

Mesazhi juaj në këtë ditë të shenjtë dy herë, ditë Ramazani, por edhe prag i Pashkëve është një mesazh që tejkalon Durrësin, dhe pushton mbarë Shqipërinë. Është një mesazh fantastik. Është një mesazh historik. Mesazhi juaj është, mesazhi i ndryshimit të Durrësit. Mesazhi juaj është për mbarë shqiptarët, ndryshimi i Shqipërisë. Mesazhi juaj është, mesazhi i shpresës së pashuar tek shqiptarët.

Rroftë Durrësi! Rroftë Shqipëria!

Qytetare edhe qytetarë të Durrësit, ne sot jemi këtu për idealet tona të lirisë. Ne sot jemi këtu, për idealet më fisnike të njeriut, për të mbështetur së bashku Igli Carën, kandidatin e lirisë, kandidatin e vullnetit tuaj, qytetarin shembullor, intelektualin e shkëlqyer, politikanin e urtë, të vendosur, njeriun që sintenzon në një: virtytet morale më të mira tuajat. Dashurinë e pakufijshme për durraskaët edhe durrsakët. Për Durrësin, plazhet, fshatrat, qytezat, të gjithë durrësaket edhe durrësakët kudo që janë.

Është nder i madh për mua të paraqes para jush Igli Carën me bindjen më të thellë se Igli Cara me besimin, votën, mbështetjen tuaj do të dëshmohet një shërbëtor i përulur para jush. Një zyrtar, një drejtues i përkushtuar para qytetarëve të Durrësit. Se Igli Cara me mbështetjen tuaj do të ndryshojë Durrësin dhe do ndikojë në ndryshimin e mbarë Shqipërisë. Se Igli Cara, të gjitha potencialet e këtij rrethi  dhe qyteti të bekuar do t’i shndërrojë në shërbime dhe mirësi për qytetarët dhe banorët e tij.

Miqtë e mi!

Më 14 maj, ju me Igli Carën, me një mision historik, do rivendosni në Durrës pluralizmin. Më 14 maj, ju me Igli Carën, do t’i thoni ndal të keqes. Mençuria e durrsakëve fton çdo qytetar të këtij rrethi të votojë më 14 maj ndryshimin.

Një fjalë e urtë popullore thotë: e keqja nuk ka fund. Nuk ka të vërtetë më të hidhur se kjo. Por e keqja nuk ka fund vetëm atëherë kur burrat dhe gratë e virtytshëm qEndrojnë indiferentë ndaj saj. Ajo nuk do asgjë tjetër, përveç indiferencën e qytetarëve të mirë. Unë kam bindjen se me 14 maj ju do votoni për ndryshimin e Durrësit, ndryshimin e Shqipërisë.

Durrsaket dhe durrsakët të cilët kanë të rregjistruar në memorie çdo muaj, çdo vit të kohërave të Durrësit, kam bindjen se në memorien e tyre shfaqen si në filma kohërat kur plazhi juaj vlerësohej dhe cilësohej më i bukuri në Evropë, dhe ky nuk është një ekzagjerim, por është një realitet. Të tillë e vlerësonin. Çfarë ndodhi në 23 vite? Në 23 vite bukuria magjepsëse e plazhit të Durrësit u asgjësua. U betonizua.

Çfarë ndodhi në 23 vite? Janë ndërtuar, siç e shihni ju me qindra e qindra, ndoshta në mos edhe mijëra pallate. Po t’ju pyes një gjë? A është ndërtuar një hotel tjetër i dytë, si ai që trashëgohet nga diktatura? Asnjë, asnjë! Por, jo se nuk janë shpenzuar para. Para janë shpenzuar mijëra herë më shumë sesa kushtonte ai, hotel Adriatiku, apo e kam gabim?! Po si ka mundësi atëherë, të mbetet një relikë në kohërat më moderne, në kohërat e një vrulli të këtij qyteti. Të mos ketë një të dytë si ai. Babëzia dhe vetëm babëzia nuk lejoi, sepse duhet të ndërtohej në çdo pëllëmbë beton. Duhej që Durrësi të zhytej në horror.

Pra, solla një shembull se ç’pësoi Durrësi në 23 vite.

A nuk është ky një kushtrim për çdo durrsake edhe durrsak, demokrate edhe demokrat, socialiste dhe socialist, të paparti dhe cilido qoftë, që ta ndalim të keqen? E keqja nuk ka fund. Ndaj dhe me 14 maj, të votojmë Igli Carën.

Miqtë e mi!

Durrësi është një kompleks natyror që mund të vendosej në çdo parajsë tokësore dhe mbitokësore. Me brigjet, me tokat, me kodrinat, nuk ka një bukuri më përrallore se Durrësi, nuk ka një vend me potenciale të tilla. Dhe përsëri të rinjtë e Durrësit marrin rrugët e botës. Përsëri ata, në vend që të punojnë në industrinë e tyre turistike, shkojnë dhe shërbejnë në turizmin e vendeve të tjera. Në vend që të punojnë në fermat e tyre, shkojnë dhe punojnë në fermat e të tjerëve.

Pse kjo? Çfarë po ndodh? Përse po largohen shqiptarët? Po largohen sepse ka një politikë genocidale. Sepse, Edi Rama po bën gjithçka që të largojë durrsakët nga Durrësi, t’i largojë shqiptarët nga Shqipëria.

Miqtë e mi!

Nëse ti krijon kushte të kalkulueshme që ua bën jetën të pajetueshme në vendin ku janë qytetarët, kjo quhet gjenocid dhe ky largim është krim kundër njerëzimit. A po ndodh kjo në Durrës? A po ndodh kjo në Shqipëri? Le t’u referohemi fakteve.

Çfarë bëri zotëria? Aktin e parë, dyfishoi taksat, përgjysmoi bizneset. Së dyti, ndërmori fushatën unike në botë. Askund në botë nuk arreston kush për çështje civile. Që kur janë themeluar kodet, çështjet civile janë civile dhe ato penale janë penale. Në një proces me një trashëgimi arkaike, të tmerrshme, arrestoi për fatura, 38 mijë qytetarë në vitin 2015. Ndërkohë kur çdo shtet në botë u paguan faturat atyre që nuk mund ta paguajnë vetë. Kurse ky u tregonte derën e burgut. Natyrisht kjo ishte përzënie.

Çfarë mund të bëjnë fermerët në Durrës e Shqipëri kur ky sjell vërshimin e qumështit pluhur nga Shemavija, dhe këta detyrohen te therrin lopët e rracës. Si mund të maten fermerët e Durrësit me prodhuesit përreth, kur vetëm Kosova subvencionon çdo hektar grurë me 400 euro, subvencionon çdo hektar serra 1000 euro, subvencionon çdo lopë me 90 euro, subvencionon çdo litër qumësht 0.3 euro?

Si mund të konkurrojnë këta fermerët tanë?

Pra, çfarë ndodh? Krijohen kushte për largimin e tyre. Nga Shkodra shkojnë dhe punojnë me qindra e qindra në Mal të Zi. Në vitin 2013, rrogat në Shqipëri ishin më të lartat në Ballkan, më të larta se në Bullgari dhe në Rumani. Nga viti 2007 deri në vitin 2014, numri i shqiptarëve rritej nga viti në vit në Durrës dhe mbarë Shqipërinë. 180 mijë familje emigrantësh u kthyen me investimet e tyre në Shqipëri. Kurse sot, 1/3 e popullsisë në 8 vite ka braktisur këtë vend të bekuar.

A nuk është kjo një thirrje zemër, një apel nga thellësitë e shpirtit të çdo shqiptari kudo që ndodhet. Më 14 maj të ndalim të keqen, të votojmë ndryshimin, të votojmë Igli Carën.

Po pse sot, si u katandisëm ne nga njerëzit më mirë të paguar, në njerëzit më keq të paguar në Ballkan brenda 8 viteve? Si ndodhi kjo? Unë ju garantoj ju si ish-kryeministër, sepse ekzistonte në çdo potencial që sot ne jo të ishim në krye të vendeve të Ballakanit, por të kishim kapur plotësisht Slloveninë, e cila ka rrogat më të afërta me BE.

Pse e them unë këtë? Nuk e them unë këtë vetëm për faktin se, 2005, 2013 u dyfishua rroga e pensioneve, u ndërtuan 11 mijë km rrugë, 1300 shkolla. Por e them unë këtë se pasuritë që ka Shqipëria, nuk i ka asnjë vend tjetër në Ballkan dhe Europë. Absolutisht, është vendi më i pasur, është vendi i pasurive përrallore, nuk ka të dytë si Shqipëria mbi tokë. Po e vjedhin, po e vjedhin, po e vjedhin! E keqja nuk ka fund, të keqen duhet ta ndalojmë!

Ku shkojnë paratë? Nuk dua t’ua mbush kokën me shifra, por t’u them vetëm një shifër. Kontrolli i Lartë i Shtetit ka gjetur se në vitin 2022, qeveria dhe administrata kanë vjedhur 122 miliardë lekë. Sa janë? Rroga vjetore e shqiptarëve, 130% më e lartë. Këto janë, nuk po them 8 miliardë që janë vjedhur në tetë vite, por po them vetëm 122 miliardë në 9 muaj.

Si i vjedhin, do thoni ju? Po i vjedhin se ndërtojnë rrugën në mes të fushës me 24 milionë euro, kur ajo kushton 2 milionë. I vjedhin se ndërtojnë shkollën 6 milion euro dhe ajo kushton 600 mijë euro. I vjedhin se mbjellin 10,30, 40 mijë fidane dhe thonë kemi mbjellë 1 milionë fidane, një pyll sa Durrësi në Tiranë. I vjedhin sigurisht!

Natyrisht nuk mbetet për rroga, nuk mbetet për pensione.

Këto ditë rezulton se kanë blerë 500 milionë euro energji. Ua them unë ju dhe durrsak e durrësake duhet ta dijë, çdo shqiptare edhe shqiptar duhet ta dijë. Se viti që këta kanë blerë 500 milionë euro, Shqipëria ka prodhuar 2 miliard kilovat/orë më shumë nga sa konsumon. A nuk është ky një krim monstruoz? Po si vjedhin? Kjo është fare e thjeshtë!

Kjo Miss Babëzia, Belinda me Ramën, këta kanë zgjedhur të dhunojnë ligjet dhe të zbrazin digat gjatë verës. Në një kur kodi i digave ndalon zbrazjen e tyre gjatë verës. Ua shesin sekserëve tyre me 30 euro dhe sekserët e tyre e shesin në bursë me 200, 180, 250 euro dhe ndajnë paratë me ta. Vjen vjeshta, digat bosh. Atëherë blejnë nga 350 euro energji.

Ky është mekanizëm i tmerrshëm i vjedhjes ndaj qytetarëve.

Po tjetër, rriten çmimet. Çfarë ndodhi me rritjen e çmimeve? Rritja e çmimeve dyfishon të ardhurat nga tvsh-ja, e cila është taksa që paguan çdo qytetar. Mblodhën 520 milionë euro, ku i çuan?Ku i çoi Kosova? Kosova ia ktheu pensionistëve 100 euro në muaj, studentëve 100 euro në muaj dhe rrogëtarëve 120 euro në muaj, etj me rradhë. Ku i çoi Edi Rama? I çoi 320 milionë për rrugët anësore, Shkëmb i Kavajës-Fier, të cilat po i ndërton me 7.2 milionë euro kilometri, ndërkohë që vetë autostrada ka kushtuar në segmentin më të gjerë të saj, 2 milionë euro kilometri.

Pra, a  nuk është kjo një thirrje t’i largojë. Nuk paguajmë asgjë më shumë se indiferencën tonë! Nuk duhet kurrë ne të vazhdojmë të ecim të përgjumur. Ndaj edhe ju demokrate e demokratë, durrsake e durrsakë ju ftoj që këto ditë që keni përpara, deri në datën 14 maj të bëjmë gjithçka. Të trokasim në çdo zemër, në çdo derë për të vendosur Igli Carën qytetar të parë të Bashkisë.

Imagjinoni ju, ajo zonja që është, ajo del nga sirtarët e Gjushit. Ajo ka një dyshe që është një nga dyshet më mafioze, jo në Shqipëri, por në Ballkan edhe më gjerë. Gjushi dhe ai Çela, mikpritësit e Massimo Denaros. Nxënësit e tij në Shqipëri. Gjush, thuaju durrsakëve sa para nga taksat e tyre i ke dhënë McGonigalit? Do ta gjejmë dhe do të bëhesh përgjegjës për to!

Megjithatë, në respekt të qytetarëve të Durrësit i sugjeroj mikut tim, Igli Cara ta ftojë në debat para qytetarëve. Të marrë edhe suflerët me vete Gjushin edhe Çelën aty prapa, që të marrin durrsakët dhe durrsaket të vërtetën. Shkon e ndërton konstruksione betoni vetëm për të vjedhur. Shkoni në Durrësin e ri, kolektori hapur, rrugë të pashtruara. Shihni kudo, trotuare të therrmuara, të copëtuara, sepse këta nuk pyesin për qytetarët. Këta pyesin vetëm për llogaritë e tyre bankare.

Ndaj dhe e vërteta është që 14 maji, është fundi i Gjushit, fundi i Ardian Çelës, fundi i Edi Ramës. Fitorja e Durrësit, fitorja e durrsakëve, fitorja e Shqipërisë.

Rroftë Durrësi! Rroftë Shqipëria! Rrofshi ju!

Fitore, fitore, fitore!