Flamuri i Kosovës, flamuri i vetëm i ndaluar në Rusi

Pas shumë vjet përpjekjesh, Federata e Futbollit e Kosovës, FFK, më në fund e mori atë që dëshironte me çdo kusht kur dy vjet më parë u bë anëtare e plotë e FIFA-s, duke u mirëpritur në këtë organizatë që numëron më shumë se 200 vende anëtare. Por, kjo mirëpritje nuk dihet se sa do të jetë e vlefshme në kompionatet tjera Botërore sepse në Rusi, Kosova nuk ishte e mirëpritur.

Zyrtarisht, flamuri i Kosovës nuk ishte i dëshiruar në Rusi gjatë kohës së botërorit, 14 qershor – 15 korrik.

Flamuri – që bart hartën ngjyrë ari të Kosovës nën gjashtë yje të bardhë në një sfond të kaltër – është një prej disa flamujve të ndaluar në stadiumet ku u mbajtën ndeshjet e botërorit nga organizatori i kësaj ngjarjeje. Në fakt, flamuri i Kosovës është i vetmi i një anëtareje të FIFA-s që nuk u lejua të shfaqet në 12 stadiumet në Rusi. Flamujt e tjerë të ndaluar nuk janë të vendeve anëtare të FIFA-s, shkruan sot “Koha Ditore”.

Ai i Kosovës është listuar si flamur i ndaluar në një dokument prej shtatë faqesh, përkrah flamujve që përfaqësojnë territoret e panjohura ndërkombëtarisht dhe organizatat e lëvizjeve separatiste. Flamuj të grupeve terroriste, si Shteti Islamik, gjithashtu janë përmendur në dokumentet për këtë ndalesë.