Fletushka në veri, thirrje për rezistencë!

Policia e Kosovës  ka bërë të ditur se ka proceduar një rast për thirrje për rezistencë, për fletushkat e shpërndara gjatë ditës së djeshme në veri, përmes të cilave jepeshin udhëzime se “s’i t’i kundërvihen Policisë së Kosovës dhe administratës komunale”.

Zëvendësdrejtori i Policisë së Kosovës për rajonin e veriut të Mitrovicës, Veton Elshani, konfirmoi se pas konsultimit me prokurorin është hapur rasti “Thirrje për rezistencë dhe nxitje e urrejtjes”.

Ai tha se për këtë rast ende nuk ka të dyshuar e as të arrestuar.

“Dyshojmë se dje gjatë dhe pas protestës këto broshura janë shpërndarë dhe ne kemi hasur në to më vonë. Pas konsultimit me Prokurorin e Prokurorisë Themelore dhe atë Speciale është hapur rasti thirrje për rezistencë dhe nxitje e urrejtjes. Nuk ka të dyshimtë e as të arrestuar”, ka thënë Elshani.

Mësohet se “Mbrojtja Popullore”, e cila së bashku me “Brigadën e Veriut” janë shpallur organizata terroriste nga Qeveria e Kosovës në vitin 2023, ka shpërndarë fletushka në veri të vendit, për t’u dhënë instruksione serbëve lokalë për rezistencë ndaj Policisë së Kosovës, si dhe ndaj shërbyesve civilë, për të cilët thanë se janë të Kurtit.

Në ato fletushka jepen udhëzime se si duhet të veprojnë serbët kur shohin patrullat e policisë e shërbyesit civilë, si të thyhet automjeti i policisë e si të bëhet një koktej molotovi.

Në to gjithashtu theksohet se kundërvënia është e detyruar.