Fluks hyrjesh në pikë kalimet kufitare

Pikat e kalimit kufitar në Shqipëri u përballën sot me fluks të lartë hyrjesh qytetarësh, por edhe automjetesh.

Intensitet i lartë u shënua në pikën kufitare në Kakavijë ku u përpunuan mbi 11 mijë shtetas, mbi 7 mijë prej tyre vetëm në hyrje me mbi 3 mijë automjete.

Autoritetet kufitare shqiptare punuan me  6 sportele ndërsa pala greke me 4 sportele.

Edhe Pikat e Kalimit Kufitar në Shkodër regjistruan fluks të lartë, ku përpunuan mbi 32 mijë shtetas, 14 mijë vetëm në hyrje të Shqipërisë, me mbi 11 mijë automjete në Muriqan dhe Han të Hotit.

Mëngjesi regjistroi dyndje hyrjesh edhe në Morinë të Kukësit, ku numri i lartë i mjeteve shkaktoi radhë të gjata deri në thellësi të territorit të Kosovës.

Në Kapshticë u regjistruan rreth 10 mijë hyrje-dalje, ku rreth 6 mijë u përpunuan vetëm në hyrje, ndërsa në Qafë Thanë u përpunuan rreth 11 mijë shtetas, ku rreth 6 mijë prej tyre ishin vetëm në hyrje.