FMN dhe OBT, kundër kufizimeve në eksporte gjatë pandemisë
Kufizimi në rritje i eksporteve, për shkak të pandemisë së koronavirusit, mund të jetë shumë kundërproduktiv, paralajmëruan të premten Fondi Monetar Ndërkombëtar dhe Organizata Botërore e Tregtisë.
Këto dy institucione iu bënë thirrje udhëheqësve globalë të përmbahen nga vendosja e kontrolleve të ashpra mbi shitjet e produkteve, ashtu siç kanë vepruar në kulmin e krizës financiare globale të vitit 2008.
“Jemi të shqetësuar me ndërprerjet e furnizimit nga kufizimi i eksporteve dhe veprimeve të tjera që kufizojnë tregtinë e produkteve mjekësore dhe ushqimore”, theksojnë FMN dhe OBT përmes një deklarate të përbashkët.
Sipas tyre, raporton RFE, ndërprerjet në zinxhirin e furnizimit dhe drejtimi i gabuar i produkteve të rëndësishme mund të zgjasin dhe përkeqësojnë krizën shëndetësore dhe ekonomike.
Fondi Monetar Ndërkombëtar dhe Organizata Botërore e Tregtisë po ashtu paralajmëruan se vendet e varfra kanë gjasa të vuajnë më shumë.
Ndërsa rregullat e tregtisë globale e lejojnë përdorimin e kufizimeve të eksportit gjatë një emergjence kombëtare, FMN dhe OBT paralajmëruan se ajo që ka kuptim në një emergjencë të izoluar, mund të jetë shumë dëmtuese në një krizë globale.
“Marrë në mënyrë kolektive, kufizimet e eksportit mund të jenë shumë kundërproduktive”, thuhet në deklaratë.
FMN dhe OBT i mirëpritën vendimet e disa vendeve për të lehtësuar tregtinë e produkteve të nevojshme për betejën kundër koronavirusit, përfshirë këtu edhe uljen e detyrimeve të importit.
Vitin e kaluar, importet globale të mallrave të nevojshme në luftën kundër koronavirusit – të tilla si maskat për fytyrë, dorezat, sapunet, veshjet mbrojtëse, maskat e oksigjenit dhe ventilatorët – kanë arritur gati në 300 miliardë dollarë.
