Foli vetëm për Opozitën/ Edi Rama sarandiotëve: Nuk dua të flas për Sarandën…

Takimin elektoral të radhës sot Kryeministri Edi Rama e zhvilloi në Sarandë, ku që në fillim i bëri të qartë rilindasve të këtij qyteti bregdetar se nuk do të flas shumë për Sarandën dhe Delvinën por vetëm votën ju kërkoi ndërsa pjesën më të madhe të fjalimit e kishte rezervuar për akuza dhe sharje ndaj opozitës.

Në kohën që Edi Rama po fliste, qytetarët dhe mbështetës të opozitës e Sarandës po protestonin, dhe ndonëse u mundua ti ironizonte sikur pas kurrizit të tij “janë mbledhur një grusht njerëzish që ulërasin”, për atë grusht njerëzish Ish-Gjeneral Sandër Lleshaj kishte dërguar FNSH-n që të kujdeset për sigurinë e shkatërruesit të këtij vendi.

“Ne jemi mbledhur këtu për të bashkëbiseduar, për t’u parë dhe për t’i dhënë dorën njëri tjetrit. Pas kurrizit tim janë mbledhur një grusht njerëzish që ulërasin, jo për të ballafaquar me ne idetë, por për të bërë zhurmë. Janë mbledhur për të prishur këtë takim. Këtu ka shumë njerëz të rinj por ka edhe të tjerë që e kujtojnë regjimin komunist. Ajo parti lindi nga shpresa për Shqipërinë si e gjithë Europa ndërsa sot po e ndan Shqipërinë nga Europa,” tha Edi Rama duke i bërë të qartë rilindasve të Sarandës se pse ishte në Sarandë:

“Tani unë nuk dua të flas shumë për Sarandën dhe Delvinën sepse thashë se kemi bërë jo pak gjëra dhe shumë të tjera mbeten për të bërë. Ju kam thënë na jepni votën në këto 4 vite të bëjmë më shumë se në vitet e tjera të marra së bashku.”

Ndryshe, qindra qytetarë dhe mbështetës të opozitës ishin mbledhur tek rruga e Flamurit, rreth 200 metra larg vendit ku Edi Rama po zhvillonte takimin elektoral, dhe ndonëse Kryeministri foli me mospërfillje për numrin e protestuesve, pas përplasjes me policinë u desh ndërhyrja e FNSH që të qetësoj protestuesit e provokuar nga efektivët e policisë në krye të detyrës socialiste.