“Foltorja” në Fier, Berisha: Rama i futi thikë pas shpine PD me dorën e pengut të tij, Lulzim Bashës
Pas ndjesës që lideri historik i Partisë Demokratike, Sali Berisha, i kërkoi demokratëve për mbështetjen e Bashës, nga takimi i parë i “Foltores për një Parti Demokratike më të bashkuar, më të fortë, më të hapur”, në takimin e radhës së “Foltores” që u zhvillua sot në Fier ai dha detaje të tjera për zhvillimet në PD që nga humbja e parë e Lulzim Bashës në vitin 2017 dhe marrëdhëniet e tij me SHBA dhe administratën amerikane.
Sot, për liderin historik Sali Berisha, këto janë ditët më të vështira për Shqipërinë dhe shqiptarët në këto 30 vite , sot, kur Edi Rama i futi një thikë mbas shpine PD me dorën e pengut të tij, Lulzim Basha.
‘’Se këtu s’ka siguri, se këtu s’të konsiderojnë të ardhmen. Rama u vret çdo minutë, çdo orë, çdo ditë të ardhmen shqiptarëve. Miqtë e mi, asnjë komb, asnjë vend, nuk prosperon, nuk begaton, nuk zhvillohet në rast se nuk kujdeset kush për interesin kombëtar,” tha Ish-Presidenti Sali Berisha duke shtuar:
“Interesi kombëtar është ai interes që konvertohet në mirësi për çdo qytetar të atij vendi. Kurse sot interesi kombëtar i shqiptarëve i është besuar Beogradit, Aleksandar Vuçiçit, kriminelit më të madh të luftës në Europë. Neobllokmenët, në plaçkitje të pasurisë shqiptarë kanë tejkaluar me dhjetëra herë baballarët e tyre bllokmenë mizorë.
Kemi 8 vite që endemi si në shkretëtirë me dyert e Europës të mbyllura. Kemi 8 vite që ne jo që nuk ecim drejt Europës, por përkundrazi shohim ndonjëherë drejt Azisë. Miqtë e mi, të dashur qytetarë dhe qytetare të Fierit, historia jonë është e dhimbshme, histori mbijetese,” tha Berisha duke theksuar se për ne, për brezat që vijnë, fëmijët e fëmijëve tanë e në vazhdim një shtyllë është shtylla e të gjitha shtyllave.
“Një shtyllë na e lanë rilindasit tanë dhe kjo është drejtimi perëndimor. Ngado të na çojë Edi Rama, Rama do të na çojë ne nga e çojnë kontot bankare, xhepi dhe karrigia e tij. Jo, ne jemi e do mbetemi ashtu siç, jemi komb i lashtë, por rilindjen nuk e kemi të lashtë, por të shekullit të 19-të.
Kishte vuajtur, kishte pësuar trauma të mëdha kombi ynë, por ata ringjalljen, rilindjen e shihnin te vokacioni perëndimor i popullit shqiptar. Integrimin në BE e kemi interes jetik kombëtar, do bëjmë gjithçka të ecim drejt saj,” tha Sali Berisha duke përfunduar:
“Në 30 vite këto janë ditët më të vështira për Shqipërinë dhe shqiptarët, jo vetëm për faktin miqtë e mi se ne sot kemi një regjim i cili në Greqinë e Lashtë quhej kakistokracisë, më i keqi, por për faktin se sot, sot, duke marrë peng kreun e opozitës, Edi Rama i futi një thikë mbas shpine PD me dorën e pengut të tij, Lulzim Basha.”
Ish-Presidenti Sali Berisha ndërsa akuzoi me këtë rast Kryeministrin Edi Rama se iu ka vjedhur të ardhmen shqiptarëve, tha se Rama do mbetet në histori si kryeministri më i lig dhe më tradhtar pas Enver Hoxhës.
“Të dashur demokrate dhe demokratë të Fierit, i dashur zoti kryetar i PD-së të degës Fier dhe deputeti i Fierit Luan Baçi. Para së gjithash unë dua të përulem me nderim të madh para jush sepse në drejtimin e degës së PD-së ju këto vite e shndërruat Fierin në qytetin e qëndresës më të fuqishme ndaj narkoshtetit dhe bëtë që qytetarët e Fierit të kenë një besim në rritje tek ju. Sot ne mblidhemi këtu me një motiv, motivi ynë është ai që buronte pak çaste më parë nga zemrat tuaja Rama ik. Rama ik sepse pas Enver Hoxhës do mbetesh në histori si kryeministri më i keq, më i lig, më tradhtar i Shqipërisë dhe kombit shqiptar. Ne ulemi këtu sot miqtë e mi 8 vite pas qeverisjes së tij në një kohë që kemi zbritur nga kreu, nga vendi krye për rrogat dhe pensionet në Ballkan, në vendin e fundit me 30% më të ulëta se Kosova. E gjithë kjo sepse kryeministri i vendit i vetmi në Europë dhe në botë që nis mandatin e tretë me veturë superluksoze 500 mijë euro. E gjitha kjo sepse kryeministri që vidhisi në pikiatë mirëqenien e qytetarëve të tij shëtit dhe në uikende me aeroplanë në dispozicion që i shkon fluturimi nga 150 mijë në 300 mijë euro. E gjithë kjo sepse ministrat e babëzitur porosisnin biftekun sa tre rroga të një punonjësi,” tha lideri historik i PD, Sali Berisha duke përfunduar:
“Sot Shqipëria, shqiptarët në të gjitha rekordet janë kampionë për zi në Europë dhe më gjerë. Sot kafshata e gojës në Shqipëri kushton 80 herë më shumë në proporcion se në vendet e BE-së.
Sot nafta në Shqipëri ka çmimin e dytë më të lartë në botë, ndërkohë kur Shqipëria ka rrogat më të ulëta në Europë.
Sot si në asnjë vend tjetër në paq, shqiptarët kanë braktisur 530 mijë prej tyre kanë marrë dherat e huaja sepse këtu nuk ka punë, nuk ka siguri se këtu nuk konsiderojnë të ardhmen. Edi Rama iu vjedh çdo orë, çdo ditë të ardhmen shqiptarëve.”
