“Foltorja” në shënjestër, pas FRPD, Basha hap garën edhe në Forumin e Gruas

Pa pushuar debati lidhur me mënyrën e shpalljes së zgjedhjeve për drejtues dhe kryetarin e Forumit Rinor, Belind Këlliçi nga frengjia e Kryetarit të PD, Lulzim Basha, u shënjestrua edhe kryetarja e Lidhjes Demokratike të Gruas së Shqipërisë, Albana Vokshi, e cila u pa në “Foltoren” e liderit historik Sali Berisha.

Meqë Albana Vokshi guxoi të marrë pjesë në “Foltore”, u zbulua se ky post mbahet me emërim që prej vitit 2012, ashtu si dhe organet tjera drejtuese të Lidhjes së Gruas.

Kështu, sot u bë e ditur se zgjedhja e kryetares së LDGSH-së do të bëhet sipas parimit 1 anëtar, 1 votë. Dhe jo vetëm kaq! PD thotë se kjo është hera e parë që anëtareve të Forumit të Gruas u njihet e drejta për të zgjedhur drejtuesen e tyre me votë direkte.

Për të garantuar standardet e procesit, Kryetari Basha ngriti një grup të posaçëm për zgjedhjet në LDGSH, i cili përbëhet nga:

1. Grida Duma
2. Arta Sakja
3. Dhurata Çupi
4. Orjola Pampuri
5. Greta Bardeli
6. Alfrida Marku
7. Ina Zhupa
8. Eralda Tase Bano
9. Zheni Gjergji
10. Ledina Aliolli

Pas shpalljes së zgjedhjeve në FRPD dhe LDGSH, tani Lulzim Basha nuk sheh gjë më nga frengjia por i mbetet të shpall garën për Kryetar të PD dhe siç e do zakoni tashmë i infektuar demokratik, sipas parimit 1 anëtar, 1 votë.