Fondet e BE për tërmetin, Rama: Kush thotë pse i vodhët paratë, të hapi veshët…

Sot ka filluar në Durrës Programi i financimit nga Bashkimi Evropian si donatori kryesor i Konferencës së Solidaritetit në Bruksel, për restaurimin dhe rijetëzimin e monumenteve të kulturës të dëmtuara nga tërmeti i 26 Nëntorit të vitit të kaluar, ku Kryeministri Edi Rama, në fjalën e tij iu përgjigj dhe akuzave për keqpërdorimin e fondeve, duke theksuar se ush thotë dhe kush përsërit si në jerm, ku shkuan paratë, pse i vodhët paratë që i dha bota, duhet të hapi veshët për të dëgjuar këtë fakt shumë të thjesht: Të gjitha fondet administrohen nga BE!

“BE u gjet pranë nesh në një moment të vështirë. Për sa i përket fondeve, një pjesë e atyre që sytë i kanë po nuk duan të shohin, veshët i kanë po nuk duan të dëgjojnë, mendjen e kanë po nuk duan që ta vënë në punë, se fondet e sjella nga donatorët administrohen nga vetë donatorët,” tha Edi Rama duke shtuar:

“Ka një keqkuptim të madh midis atyre që sytë i kanë por nuk shohin, për të kuptuar se fondet e mbledhura administrohen nga vetë donatorët. Për të kuptuar se BE përmes instrumenteve të vet dhe në këtë rast në bashkëpunim me një strukturë të posaçme të OKB-së, UNOPS do të administrojë nga pikëpamja tekniko-financiare të gjithë programet qoftë për trashëgiminë kulturore, qoftë për shkollat.”

Ndonëse sot filloi programi i financimit të Bashkimit Europian si donatori kryesor i Konferencës së Solidaritetit në Bruksel, për restaurimin dhe rijetëzimin e monumenteve të kulturës të dëmtuara nga tërmeti i 26 nëntorit të vitit të kaluar, Rama vazhdoi duke u arsyetuar para opinionit se nuk ishte ai që i vodhi këto para:

“Administrimi i taksave të evropianëve është përgjegjësi e vetëm e tyre. Kush thotë dhe kush përsërit si në jerm, ku shkuan paratë, pse i vodhët paratë që i dha bota, duhet të hapi veshët për të dëgjuar këtë fakt shumë të thjesht; Të gjitha fondet administrohen prej tyre. Nuk na lanë një thes që na e dhanë ne pas konferencës dhe ne e morëm e tretëm, siç u thotë fantazia atyre që i morën paratë në të shkuarën dhe kujtojnë se janë të gjithë si ata,” tha Kryeministri Edi Rama dhe ndërsa kuptoi se e teproi kërkoi dhe ndjesë:

“I kërkoj ndjesë partnerëve për këtë sqarim të domosdoshëm. Soreca nuk bën thjesht detyrën si ambasador i BE-së por është një mik shumë i përkushtuar i Shqipërisë dhe shqiptarëve dhe kjo bën diferencën.”