Fondi i rindërtimit 20 mld lekë, Edi Rama: 261 pallate të dëmtuara rëndë; Elvis Naçi: Do të…

Në mbledhjen e dytë të Komitetit Kombëtar të Rindërtimit, Kryeministri Edi Rama fillimisht ka bërë një bilanc të dëmeve pas tërmetit ndërsa bëri të ditur se Fondi i Rindërtimit do të jetë 20 miliard lekë. Ndërkohë Imami Elvis Naçi foli për menaxhimin e Fondeve.

“Janë 261 pallate të dëmtuara rëndë dhe të pabanueshme në momentin aktual. 2137 banesa të dëmtuara rëndë. 851 pallate me dëmtime të mesme ose të lehta.4618 banesa me dëme të mesme.

Në Qarkun e Tiranës janë inspektuar 728 ndërtesa. Qarku i Durrësit 5667 ndërtesa të inspektuara, 438 për t’u shembur. Në Lezhë janë 1588 ndërtesa me dëmtime të konsiderueshme, 740 me dëmtime të mesme. Të gjitha 8 spitale me dëme të riparueshme, 2 me të lehta dhe 2 qendra shëndetësore jashtë funksionit 12 të tjera të riparueshme,” tha Edi Rama dëme për identifikimin e të cilave janë angazhuar 500 inxhinierë, dhe:

“20 mld lekë që në nisje me të ardhura buxhetore plus donacione, por pritshmëritë për donacione janë të konsiderueshme se kanë filluar bisedimet me shtet e tjera. 666 familja janë aprovuar si përfituese e fondit me qira. Në Durrës nuk ka më apartamente, nga 1120 familje, 922 janë akomoduar, pjesa tjetër në akomodim e sipër.”

Përveç kësaj, Kryeministri foli për rastet që njerëzit po i shembin shtëpitë  e tyre për, siç tha, përfitimin nga situata e post tërmetit për t’i rindërtuar ato edhe pse nuk është e qartë nga çfarë përfitojnë kur të gjithë po ankohen se nuk po ndihmohen.

“Ka raste që po u bien me vare shtëpive. Kjo histori ka një cak. Mos bëni aventura të tilla sepse inventari është ky që është. Shqipëria ka banesa në situatë kritike më shumë se kaq. Por ata nuk hyn në këtë program. Programi bëhet për ata që kanë humbur strehën, por nuk hynë dot në shtëpi. Duhet të jem shumë i qartë sepse është e pamundur vetëm shto, shto. Numrat janë këto që janë dhe ne do ti përditësojmë.”

Në mbledhjen e dytë të Komitetit Kombëtar për Rindërtimin u fol edhe për menaxhimin e Fondeve për të cilat Imami Elvis Naçi tha se do të menaxhohen nga vetë ato.

Dhe jo vetëm kaq! Elvis Naçi tha se ka ka marrë dritën jeshile nga qeveria dhe në Thumanë do të nisë puna për blerjen e disa banesave dhe rregullimin e atyre që janë të banueshme.

“Fondet që do mblidhen nga Fondacionet do menaxhohen nga vetë ato. Aktualisht fondacioni “Firdeus” ka arritur në kuotën 6 milionë euro, dhe mendohet të shkojmë drejt 10 milionë euro, por më pak se buxheti i shtetit. Dje kam qenë në Thumanë dhe ata na thanë që pse nuk po ndërtoni. Ne i thamë që sapo të na japi dritën jeshile qeveria do nisim. Sot morëm dritën jeshile që për ato familje që kanë pak probleme apo duhet t’u blejmë një shtëpi.”

Fondacioni i tij, tha Imami Elvis Naçi, do të marrë pjesë edhe në ndërtimin e blloqeve të pallateve për të prekurit.

“Ne kemi dëshirë që të ndërhyjmë dhe të ndihmojmë dhe në blloqe pallatesh. Ata nuk kanë kesh por kanë mundësi të kontribuojnë në mënyrën e tyre. Jemi të gjithë bashkë për një të mirë që duhet i shkojë shqiptarëve që u sprovuan kaq shumë nga tërmeti.”