Forca të shtuara të KFOR-it sërish në urën mbi lumin Ibër

Forca të shtuara të misionit paqeruajtës të NATO-s, KFOR, u vunë re edhe sot në urën mbi lumin Ibër në Mitrovicë.

Pjesëtarë të misionit thanë për RFE se bëhet fjalë për disa stërvitje.

RFE i kërkoi përgjigje zyrtare nga KFOR-i, por nuk mori.

Ky mision ka prani të përhershme në urën mbi lumin Ibër, që ndan Mitrovicën në jugun e banuar me shqiptarë dhe veriun e banuar me shumicë serbe.

Forca të shtuara ka pasur edhe në fundjavën e kaluar, kur misioni ka konfirmuar se ka kryer disa trajnime.

Këto zhvillime vijnë pak ditë pasi autoritetet e Kosovës kanë mbyllur pesë institucione paralele serbe në veri.

Banorët serbë të zonës, prej vitesh, kanë marrë shërbime të ndryshme në to dhe mbyllja e tyre ka shkaktuar reagim të ashpër të bashkësisë ndërkombëtare kundër Kosovës.

Kjo, përkundër faktit se për shuarjen e këtyre strukturave ka një marrëveshje që është arritur në Bruksel qysh në vitin 2013, por zbatimi i saj ka ngecur.

Bashkësia ndërkombëtare, megjithatë, kërkon që të gjitha çështjet që lidhen me situatën në veri, të trajtohen në kuadër të dialogut për normalizimin e marrëdhënieve.

Ngjashëm ka kërkuar të trajtohet edhe çështja e hapjes së urës mbi lumin Ibër për qarkullimin e makinave, gjë të cilën Qeveria e Kosovës ka paralajmëruar se do ta bëjë.

Hidhet mjet shpërthyes në oborrin e një shtëpie në Zubin Potok

Policia e Kosovës ka konfirmuar se sot në orët e hershme është hedhur një mjet shpërthyes në oborrin e një shtëpie të banuar me serbë në Zubin Potok.

Zëvendësdrejtori i Policisë së Kosovës për veriun, Veton Elshani, tha se dyshimet ekzistojnë që bëhet fjalë për granatë dore.

“Ka pasur dëme materiale në vetura dhe në dritaren e shtëpisë”, ka thënë ai, duke treguar se Policia ka nisur hetimet për këtë rast.

Elshani nuk ka bërë të ditur nëse ka pasur pasoja në njerëz.

Një rast si ky nuk është i rrallë në veriun e Kosovës në vjetët e fundit.

Për hedhje të mjeteve shpërthyuese dhe djegie të veturave është raportuar disa herë në këtë rajon, sidomos në kohën e riregjistrimit të makinave me targa ilegale serbe në ato RKS – Republika e Kosovës.

Zubin Potoku, bashkë me Mitrovicën e Veriut, Zveçanin dhe Leposaviçin, janë katër komunat me shumicë serbe në veri.

Tensionet në atë pjesë kanë qenë relativisht të larta në muajt e fundit, për shkak të atyre që Qeveria i konsideron si hapa për shtirje të sovranitetit në atë pjesë./RFE/