Forcat serbe rrëmbejnë tre policë të Kosovës, Kurti: Agresion dhe synim për destabilizim!

Hakmarrje të Serbisë për arrestimin e djeshëm të kriminelit famëkeq Millun Millenkoviç – Lune, e cilëson Kryeministri i Kosovës, Albin Kurti, rrëmbimin e tre zyrtarë të policisë së Kosovës nga forcat serbe ndërsa hyrjen e tyre në territorin e Kosovës, një agresion dhe synim për destabilizim.

“Tre zyrtarë të policisë së Kosovës janë rrëmbyer sot në Leposaviq në vendin ku dikur kishte një rrugë ilegale të kontrabandës e që ndodhet rreth 300 metra në brendësi të territorit të shtetit tonë.

Dyshojmë që ata janë rrëmbyer nga ushtria e Serbisë, qartazi si hakmarrje e Serbisë për arrestimin e djeshëm të kriminelit famëkeq Millun Millenkoviq – Lune, i cili paraqet një ndër krerët e krimit të organizuar dhe kontrabandës,” thekson Albin Kurti në reagimin e tij përmes rrjetit social Facebook duke vlerësuar se Policia e Kosovës është treguar tejet e vetëpërmbajtur ndërsa përfundon:

“Hyrja e forcave të Serbisë në territorin e Kosovës është agresion dhe synim për eskalim dhe destabilizim. Kërkojmë lirimin e menjëhershëm të tre zyrtarëve të rrëmbyer policor dhe ftojmë faktorët ndërkombëtarë që të dënojnë këtë akt agresioni të Serbisë.”