“Forcimi i Drejtësisë Penale”, Yuri Kim: Korrupsioni, cënim i sigurisë kombëtare të SHBA dhe Shqipërisë

Duke përgëzuar të gjithë prokurorët që janë duke punuar për popullin shqiptar, Ambasadorja e SHBA në Tiranë, Yuri Kim, rikujtoi Urdhërin nga muaji i kaluar i Presidentit Biden kur e bëri të qartë se Shtetet e Bashkuara e konsiderojnë korrupsionin cënim të sigurisë kombëtare të SHBA, miqve dhe aletëve duke përfshirë edhe Shqipërinë.

“Ajo që jemi duke parë është rezultat i një pune të gjatë, të vështirë. Orë të tëra duke kaluar dhe duke parë faktet sipas rastit. Faleminderit që më keni ftuar për të parë përpjekjet tona të përbashkëta në luftën kundër krimit. Ju e dini më mirë se unë, unë jam e huaj. Të gjitha institucionet duhet të punojnë së bashku për të ndërtuar besimin e publikut në drejtësinë penale. Veprimet që kemi dëshmuar në javët e fundit, madje në vitin e fundit, që kur janë ngritur institucionet e reja, kanë ngritur besimin e qytetarëve. Ngritja e këtyre institucioneve, është me rëndësi. Ky është çast i rëndësishëm. Sistemi është funksional. Por nuk është ende në majë të performancës, për shkak të mungesës së personelit dhe të mungesës së besimit,” tha Yuri Kim duke rikujtuar prokurorët shqiptarë Urdhërin e Presidentit Biden mbi korrupsionin:

“Muajin e kaluar, presidenti Biden e bëri të qartë se SHBA-të e konsiderojnë korrupsionin cënim të sigurisë kombëtare. Jo thjesht se kërcënon SHBA por sigurinë e miqve dhe aletëve tanë, përfshi Shqipërinë. Si pasqyrim i kësaj politike të re, presidenti Biden zgjeroi shtrirjen e urdhrit ekzekutiv për të sanksionuar personat e përfshirë në destabilizimin e Ballkanit, për të përfshirë edhe për Shqipërinë. Ai ka identifikuar sjellje të tjera të dënueshme dhe e ka bërë urdhrin ekzekutiv ndaj një game të madhe personash të përfshirë në aktivitete që çojnë në abuzime serioze, në Ballkanin perëndimor, ose që kanë të bëjnë me korrupsionin,” tha Ambasadorja e SHBA në Tiranë, Yuri Kim, duke përfunduar:

“Ky urdhër duhet t’ju nxis të gjithëve që të punoni së bashku, për të gjetur mënyrat më të mira, SHBA do të vazhdojnë që t’iu mbështesin, për të ndërtuar një Shqipëri më të begatë, me institucione që shërbimin për publikun e bëjnë përparësinë e tyre.”

Ndërsa kreu i SPAK, Arben Kraja, tha se lufta kundër krimit të organizuar e korrupsionit dhe pastrimit të parave mbeten prioritet e Struktura e Posaçme Kundër Korrupsionit Dhe Krimit Të Organizuar e pas publikimit të dy-tre ngjarve ditët e fundit, nuk është fundi por fillimi i një produkti të punës në të ardhmen.

“BKH është drejt konsolidimit, përzgjedhja e grupit të dytë është drejt fundit, besoj deri në fund të vitit. Është e domosdoshme të mendohet për një hapsirë të duhur të akomodimit. Pavarësisht se jemi struktura, por ushtrojmë të njëjtin funksion, bëjmë të njëjtën punë. Kemi firmosur një marrëveshje mirëkuptimi. Kemi përmbyllur detyrimet gjatë këtij viti për raportim qoftë me KLP si edhe me Kuvendin, arritëm të realizojmë detyrimet,” tha Arben Kraja duke shtuar se janë pjesë e strukturës që raportojnë për BE, edhe në drejtim të pjesëmarrjes në grupet e punës për hartimin e ligjeve të ndryshme. Kemi qenë prezent në gjykatë kushtetuese. Kemi zbatuar detyrimet ligjore, në raport me institucionet e tjera.

“Lufta ndaj krimit të organizuar dhe korrupsionit mbeten prioritet. Dy-tre ngjarje janë bërë publike ditët e fundit, nuk është fundi por është fillimi i një produkti të punës sonë në të ardhme. Lufta kundër krimit, pastrimit të parave janë ndër prioritetet tona,” tha kreu i SPAK, Arben Kraja duke përfunduar:

“Puna jonë mbaron kur kemi një vendim të formës së prerë të gjykatës, jo me masa sigurimi. Dërguam për gjykim një grup të rrezikshëm kriminal. Në të ardhmen kemi shumë punë për të bërë, është vullneti, prokurorët kanë pavarësinë e duhur për të vendosur bazuar në prova, kanë mbështetjen e duhur. Bashkëpunimi do të vijojë me të gjitha strukturat.”