FOTO/ Kupa e Botës, Rusia shpartallon A.Saudite

By Pa frike Last updated Qer 14, 2018 90

Arabia Saudite pësoi një humbje të thellë në startin e Kampionatit Botëror – “Rusia 2018”.

Rusia fitoi me rezultatin 5:0 ndaj Arabisë Saudite, në ndeshjen e parë të grupit A, ku arabët bënë një lojë të dobët me shumë gabime.

Në një atmosferë madhështore në stadiumin “Luzhniki Arena” në Moskë, të pranishëm 81 mijë spektatorë panë një lojë të mirë sidomos nga ana e rusëve që ishin më të shkathët në repartin e sulmit.

Në minutën e 12-të, Zobnin me mjeshtri harkoi në 16-shin e Arabisë Saudite, kurse Yury Gazinskiy nga afërsia rreth 6-7 metra, goditi bukur me kokë dhe mposhti portierin arab Al Muaiouf, 1:0.

Tre minuta pa përfunduar pjesa e parë, Cheryshev në pozitë të volitshme, por në vend që të gjuajë me të parën, ai e mbajti topin në këmbë dhe rasti shkoi në pakthim. Pas një minute (43’) Rusia thellon epërsinë në 2:0.

Denis Cheryshev nxori jashtë loje dy-tre mbrojtës arabë dhe me goditje të fortë nga afërsia shënon për 2:0. Në minutën e 71-të, Artem Dzyuba, që nuk kishte një minutë që u fut në lojë, thellon epërsinë në 3:0. Në minutën e 90+1, Denis Cheryshev nga rreth 15 metra me një goditje mjeshtërore parabolloi portierin arab dhe 4:0, ndërsa Aleksandr Golovin vulosi fitoren në 5:0 në minutën e 90+5.

Mbrojtja e Arabisë Saudite nuk reagoi si duhet dhe këtë huti të tyre e ka shfrytëzuar Dzyuba i cili nga afërsia me kokë shënon. Në hapje të garës më të madhe botërore, Rusia arkëton tri pikë ndaj një Arabisë Saudite që nuk tregoi stabilitet në mbrojtje. Me 19 qershor Rusia takohet me Egjiptin, kurse me 20 qershor Arabia Saudite sfidohet nga Uruguai.

Rusia-Arabia Saudite 5:0

Stadiumi “Luzhniki Arena” në Moskë.

Gjyqtar: N. Pitana.

Shikues: 81.000.

Shënues: Gazinskiy (12’), Cheryshev (43’ e 90+1’), Dzyuba (70’), Golovin (90+5’).

Kartonat e verdhë: Golovin – Jassim.

Rusia: Akinfeev, Fernandes, Kutepov, Ignashevich, Zhirkov, Gazinskiy, Zobnin, Samedov (Kuzyaye 64’), Dzagoev (Cheryshev 24’), Golovin dhe Smolov (Dzyuba 71’).

Arabia Saudite: Al Muaiouf, Al Burayk, Hawsawi, Hawsawi, Al Shahrani, Al Dawsari, Otayf (Al Muwallad 64’), Al Faraj, Al Jassim, Al Shehri (Bahbir 72’) dhe Al Sahlawi (Asiri 84’).