Franca kundër rihapjes së bisedimeve për Brexit

Kryeministri britanik, Boris Johnson pas një diskutimi në Paris me presidentin e Francës, Emmanuel Macron, lidhur me Brexit-in, dhe mundësinë e rihapjes së marrëveshjes të cilën Londra e ka arritur me Bashkimin Evropian, tha se vota e britanikëve për të lënë BE-në duhet të respektohet.

Në anën tjetër, presidenti Macron në konferencën e përbashkët konfirmoi se “ne e respektojmë” vendimin e Britanisë për t’u larguar nga BE por sqaroi:

“Një Brexit pa marrëveshje nuk është zgjidhja jonë, por është detyra jonë të jemi të përgatitur edhe për atë opsion”, tha Macron duke shtuar se është shumë e rëndësishme që BE të mbajë marrëdhënie të privilegjuara me Britaninë.

Sipas tij, muaji i ardhshëm mund të jetë i dobishëm, por nuk mund të ndryshojë asgjë në marrëveshjen e tërheqjes.

Përkundër qëndrimit të palëkundur të presidentit Macron për të mos rihapur bisedimet, kancelarja gjermane, Angela Merkel, ka treguar më shumë fleksibilitet në këtë drejtim. Dje, ajo tha se çështja ishte në Britaninë e Madhe për të gjetur një plan të zbatueshëm.

Kjo duket të jetë përpjekja e fundit e kryeministrit britanik për të bindur udhëheqësit evropianë që të ndryshohet marrëveshja e Brexit-it.

Britania e Madhe duhet të dalë nga BE më 31 tetor.

Gjatë një konference për media së bashku me kryeministrin Johnson, kancelarja Merkel tha se një zgjidhje mund të jetë e arritshme brenda 30 ditësh.

Duket se ajo që synon kancelarja Merkel janë bisedimet për një deklaratë politike, si një dokument ligjërisht jodetyrues për marrëdhëniet e ardhshme midis Britanisë së Madhe dhe BE-së, raporton BBC.